Pep-a'n FIFA Awards a sawisel

Manchester City manager Pep Guardiola chuan Best FIFA Men's Player award dawng tur zinga a player-te an tel lo chu mak a tih thu a sawi a, "Ka player-te tel ve theihna tur chuan nomawi panga emaw paruk chawi a ngai a ni mai thei a, point 250 kan hmuh a ngai a ni mai thei bawk," a ti a, a ṭawng na hle. 

Pep hian player mal hming la chhuak zuiin, "Season hman zawh takah khan Bernardo Silva aia season hmang ṭha zawk ka hre lo. Portugal nen Nations League a chawi bawk a ni," tiin a player pawimawh chuan lan a phu thu a sawi. 

Premier League champion player tan hmun a awm loh laiin Liverpool-in player pathum Virgil van Dijk, Sadio Mane leh Mohamed Salah an thawh a, Tottenham Hotspur striker Harry Kane a lang bawk. Pep chuan, "Footballer ṭha ber thlanna award ho hi chu Champions League nomawi chawitu team tan a ni ber," a ti zui - City hian season hmasa khan Premier League, FA Cup leh League Cup-ah nomawi an chawi vek a, English club zinga domestic treble champion hmasa ber an ni. 

Premier League season hnuhnung pariatah City hi vawi li an champion a, hetichung hian City player zingah PFA Player of the Year award chawimawina dawng pawh an la awm ngai lo! Spanish manager hlawhtling chuan, "Kum riata nomawi pali chawi chu ṭha tak a ni. Mahse, David Silva, Vincent Kompany emaw Yaya Toure ten mimal chawimawina an dawng lo. Mohamed Salah ka zah em em a, mahse 2017-18 season-a 100 points kan neih khan  Kevin de Bryune-a'n dawn a phu zawk a ni," a ti zui a, a ṭawng tui hle. 

2011-12 a City an champion khan Robin Van Persie hnenah PFA Player of the Year award hlan a ni a, Luis Suarez (2013-14), Mohamed Salah (2017-18) leh Virgil van Dijk (2018-19) ten City champion season-ah Premier League mimal chawimawina sang ber hi an dawng bawk. "Real Madrid leh Barcelona-in nomawi pali an chawi ṭumin an player lang miah lo se, a mak ngawt ang," tiin Pep-a'n a sawi chhunzawm a, lungawi harsa a ti.