An ramah Thiem a champion

Austrian tlangval Dominic Thiem chuan an ram tennis inelna Austrian Open final-ah Albert Ramos-Vinolas hnehin a champion a, world number 4 hian tennis a khelh hun chhungin nomawi 14 a chawi tlinna a ni ta 

chiah bawk.

Inrinni zan final inkhel hmuhnawm takah seeded pakhatna Thiem hian Spain tlangval hi 7-6 (7/0), 6-1 in a hneh a, French Open hnuah grass court inelna hmachhawn leh tawh mah se an rama inelna hi a inkhelh thiamna hmun clay-a khelh a nih avangin a chungnung hle.

Season kal laiah Thiem hian Indian Wells leh Barcelona-ah nomawi a chawi tawh a, clay court inelna lian ber French Open-ah pawh final lutin nomawi inchuhna inkhelah Rafael Nadal a ngam lo - atan season ṭha a chhiar theih a ni.

Austrian tlangval zingah Thomas Muster chu 1993 khan world number 1 ni chungin an rama inelnaah hian a champion a, ani hnuah Thiem hi a sulhnu zui leh thei hmasa a ni - 2014 final khan Thiem hi David Goffin lakah a lo tlawm tawh.

Kum 25 mi Thiem chuan, "Tennis ka khelh chhunga ka hun tawn nuam leh hlimawm ber pakhat chu ka tawng ta. Mipuiin min ṭan hle a, ka chhungte leh ṭhianṭhate hmaa champion nih theih aia nuam hi a awm thei tawh chuang lo," a ti.

Tunah chuan Thiem hi US Open inbuatsaih nan hard court lamah a inlan zui dawn. Tun kar chhunga khelh tur Montreal Masters-ah a inlan dawn, a match hmasa berah 2017 semifinalist Denis Shapovalov leh Pierre-Hugues Herbert te inkhela chak zawk a hmachhawn ang.