Durand Cup khelh ṭan a ni ta

Asia khawmualpuia football tournament upa ber Durand Cup chu Zirtawpni khan khelh ṭan a ni leh ta a, Mohun Bagan chuan match hmasa berah Mohammedan Sporting Club 2-0 in an hneh nghal. 

Mohun Bagan tan striker thar Salva Chamorro chuan goal hnih a khung nghal a, kum 29 mi striker hi Villarreal youth system chhuak niin season hmasa khan Greek second division club Doxa Drama tan a khel. 

Inrinni khan Kolkata club lian dang East Bengal an inlan ve bawk a, Army Red chu 2-0 in an hneh. Club kum 100 tlinna lawm mek East Bengal tan hian Spanish midfielder Jaime Santos leh Bidyashagar Singh te chuan goal khat ve ve an khung bawk. 

Durand Cup-ah hian team 16 an tel a, group paliah team pali zel awmin ṭhen hran an ni. Group tina a sang ber ṭheuh hian semifinal an lut ang a, August 24-ah final khelh a ni ang. West Bengal chuan he inelna hi a thleng a, khawpui pathum Kolkata, Howrah leh Kalyani-a stadium-ah te khelh a ni. Inkhel en duh tan Adda Times app-ah live-in an pe a, app hi Google Playstore leh Apple Store-ah a download theih.