Bayern Munich chungah Borussia Dortmund

Borussia Dortmund chuan Bundesliga champion Bayern Munich 2-0 a hnehin German Supercup an chawi a, Lucien Favre naute hian season hmasa lama an ngam loh an hneh tak avang hian kuminah beiseina an nei sang dawn.

Inrinni zan inkhelah Jadon Sancho chu player hmuhnawm leh langsar ber a ni a, English rawlthar duhawm hian goal a khung bakah Paco Alcacer khung tur a siamsak bawk - Sancho hian an inkhelh zawh hnuah an tan season duhawm a nih a beisei thu a sawi.

German Supercup khelh niah Dortmund captain Marco Reus chu German Footballer of the Year lawmman hlan a ni a, Germany international hian inkhel tir lamah Manuel Neuer tan hna hautak siamsak mah se Bayern captain a chesual duh lo.

Signal Iduna Park-ah Bayern keeper Neuer hi nidanga a tih fo angin minute 16-naah a rawn tlan hma vak a, forward Alcacer chuan lo hmu fuhin an ball inchuh lai chu goal lamah a pet thut - goal ban hrulah ball a kal chhuak hlauh, Neuer mualpho lohna chu tlemte chauh a ni.

Second half tir lamah Sancho-a'n goal hmahruai a khung, German champion lamin si phurh sut theihna hun nei mah se Leon Goretzka pet leh Kingsley Coman-a tauh chu Marwin Hitz-a'n ṭha takin a lo dansak. Minute 69-naah Alcacer chuan an goal hnihna khungin Bayern lamin a chhanletna an nei lo.

German Supercup hi Bundesliga champion leh German Cup champion ten an khelh ṭhin a ni. Season hmasa khan Bayern hian an chawi kawp a, league lama pahnihna Dortmund nen an inhmachhawn a ngaih phah.

Season hmasa league-ah khan Bayern hi Dortmund aiin point hnihin an sang zawk a, an elpui club nen an intawn hnuhnung zawk chu April kha niin Niko Kovac-a naute hi 5-0 ngawtin an chak - tun ṭumah erawh boruak a danglam ta.

Dortmund winger Jadon Sancho chuan, "Season hmasa khan nomawi pahnih an chawi avangin kan tan chuan he inkhel hi chona nasa tak a ni dawn tih kan hre lawk. Pre season kan neih lai khan kan thawkrim em em a, tunah chuan kan zir leh tum anga kan khel chhuak thei ta hi a lawmawm takzet. Kan tan kum ṭha a nih ngei ka beisei," tiin season tharah nomawi chawi theih a beisei thu a sawi.

Coach Lucien Favre chuan, "Bayern khan ball possession 65% an nei a, chutiang chunga hnehna chan chu inkhel hautak tak a ni tih a chiang. Tlarhnung kan inveng ṭha a, a hunah tak counter attack kan nei thei ṭhin kha a lawmawm," a ti.

Bayern Munich coach Niko Kovac chuan Borussia Dortmund an hneh lo chu pawmthiam harsa a tih thu a sawi a, an chak lohna bakah a naute khelh danah hmasawnna lai tur a la tam thu a sawi chhuak.

German champion hian season hmasa lama an player chhawr rim Serge Gnabry, defender manto Lucas Hernandez leh Javi Martínez te chu an chhawr thei lo a, player dang erawh harsatna nei loin an inlan thei.

Kum 47 mi Kovac chuan, "Inkhel kan thunun chungin vawi hnih tihsual kan nei a, kan tihsual kha Dortmund lamin an chhawr ṭangkai thung. Season inbuatsaihna ang a la ni a, player ṭhenkhatin duhthusam lo mah se minute 90 chhung inkhelh a harsatzia ka hriatpui, chutihrualin mimal tinin hmasawnna tur an ngah," tiin an title humhim chu thil awlsam a nih dawn loh thu a sawi.

Bayern defender Joshua Kimmich chuan, "Chak phu zawkin hnehna an changah ka ngai, hun chanve hmalam kan inveng a, a hnu lamah nawr mah ila a tlai tawh. Dortmund khan rang taka min chhaih buai nghal zel avangin tihsual kan ngah," tiin a sawi.

––––––––––––––––

Dortmund: Hitz – Piszczek (Wolf 80'), Akanji, Toprak, Schulz – Witsel, Weigl – Sancho (Bruun Larsen 80'), Reus (c), Guerreiro (Hakimi 74') – Alcacer

Unused subs: Oelschlagel, Zagadou, Schmelzer, Delaney, Dahoud, Gotze

Inhliam: Brandt (tihrawl), Burki (ngal), Morey (dar), Hazard (kerek), Hummels (hriat loh).

Bayern: Neuer (c) – Kimmich, Sule, Boateng, Alaba (Sanches 70') – Tolisso, Thiago (Pavard 80') – Müller (Davies 65'), Goretzka, Coman – Lewandowski

Unused subs: Ulreich, Hoffmann, Arp, Singh, Johansson

Inhliam: Gnabry (malpui), Hernandez (fit lo), Martinez (khup).