Thla thum atan Messi an hrem

Lionel Messi chu ṭawngkam mawi loa taka South American Football Confederation a sawisel avangin thla thum chhung international match khel thei lo tura hrem a ni a, £41,121 (Nuai 34.83) chawitir a ni bawk.

Barcelona forward Messi te ram hi Copa America-ah Brazil hneh loin semifinal-ah an tla a, pathumna inchuha Chile nen an inkhelh ṭumin red card a hmu. Hnawhchhuah a nih avang hian match khat chhung hrem a ni tawh.

Argentina captain hian Copa America chu 'Brazil champion theih nana duan lawk' tiin a sawisel a, an khawmualpuia football thuneitu sang CONMEBOL chu eirukna kawnga fihlim lo tiin na takin a sawisel bawk. CONMEBOL chuan Messi chungah hremna alekkawh ta a, hrem a nih vang hian September leh October thla chhunga Chile, Mexico leh Germany te nen friendly match an khelh turah a inlan thei dawn lo.

Argentina hian 2022 World Cup qualifier chu nakkum March thla aṭangin an khel ṭan dawn chauh, inelna pawimawh an khelh hunah chuan harsatna nei loin Messi hi an chhawr thei leh tawh dawn tihna a ni.