Aizawl FC-in Police an sawp

NEXA I Day Football-ah Aizawl FC-in MFA Super Cup champion Mizoram Police chu 5-1 zetin an sawp. Lalbiaksanga Colney hoten kum 2012 hnua a vawi khat nan inelna lian thamah Police hian nomawi chawi mah se I League club laka an mualphona avangin vawi leh khatah an hlimna nuai rehin an awm.

Police-in August 7, Nilaini hian MFA Super Cup final-a an hmachhawn Chanmari nen an inkhel ang a, I League club Aizawl FC-in coach Lalsangzuala Hmar hnuaia khel Electric Veng FC an hmachhawn ve bawk ang.

Aizawl FC-in minute 36-naah Jonathan Lalrawngbawla hmangin an khung a, ball petu Paul Ramfangzauva nen Police tlarhnung an ṭhiat chiang hle. Minute hnih hnuah Mizoram Police tan Lalbiakhlua'n (Hlutea) siphurh a sut nghal a, I League club an la chungnung bik lo.

Second half-ah Aizawl FC an danglam hlak. Minute 63-naah Jojo-a ball pek chu Isak Vanlalruatfela'n chiang zetin Police goal-ah a khung. Rochharzela'n minute 69-naah box pawn chiah aṭangin a lirin a pet lut a, minute nga hnuah Rochhara tho hian a pet goal-na hmun ngai aṭang thoin goal kilah a khung leh bawk.

Inkhel tur thlirlawknaah Aizawl FC-in player naupang an rin ngam tur thu tarlan a ni a, minute 85-naah Vairengte rawlthar David Lalhlansanga'n I League club goal ngana a khung. 

Aizawl FC-in MFA Super Cup-ah an inpeih loh avangin an tel lo a, Stanley Rozario kaihhruaina hnuaia an inpeih meuh chuan champion zo hlim Mizoram Police an sawp.

Chutihrualin Police hian an player ṭha ṭhenkhat an chawlhtir avangin I League club hi inchhuang thei an la ni bik lo. Tualchhung football ngainatute duhthusam erawh intawng leh thuai se tih a ni ang.