Lewis Hamilton a sang zual zel

Formula 1 season hmang fuh tak Lewis Hamilton chuan a nomawi kawl lai humhim turin kawng dik a zawh zel a, Pathianni zana tlan Hungarian Grand Prix-ah Max Verstappen hnehin pakhatna dinhmun a luah.

Hungaroring tlankawngah Mercedes driver chungnung ber mah se a teammate Valtteri Bottas chu pariatna a ni phak chauh. Red Bull leh Ferrari driver-ten Hamilton umphak an tum viau nachungin British driver hi dan theih a ni lo.

Germany Grand Prix-ah Hamilton hian beisei a phak lo, tun ṭumah pawh pole position a chang phak lo - world champion ni lai hian pathumna aṭangin bul a ṭan. A vawi khat nan Verstappen-a'n a hmasa ber aṭangin inelna a hmachawn thung.

Red Bull driver Max-a'n bul ṭan fuhin tlan chak viau mah se a boruak san vanglaiin a ruh a la no deuh a, lap 70 tlan tur zinga 67 an tlan laiin Hamilton hian rawn tlan pelin hnehna a chang - kum 34 mi hian Hungary-ah a vawi sarih nan hnehna a chang a, car intlansiakna sang berah hian vawi 81 zet a chak tling ta bawk.

World champion vawi li ni tawh Sebastian Vettel chu pathumnaah a thleng a, Ferrari driver hnungah hian a teammate Charles Leclerc bakah Carlos Sainz leh Pierre Gasly ten an zui ve bawk. Season kal laiah team ṭhenkhatin hmasawn viau mah se Mercedes an la elphak chiah lo tih a hriat theih.

Hnehna a chan hnuah Hamilton chuan, "Tun hnai intlansiak zawng zawnga thil thlen dan ka hre reng vek lo, hei erawh ka hre chiang - Max hi driver hmasawn leh elpui hautak a tling. Tun anga hma a sawn zel a nih chuan a ṭha ber zingah a awm reng ang," a ti.

Season kal laiah intlansiak vawi 12 an hmachhawn tawhah Hamilton hian point 225 zet a hmu tawh a, amah hneih bertu Bottas nen an inkarah point 61 zet a awm avangin nipui chawlh chu hahdam takin a hmang thei dawn. September 1-ah Belgian Grand Prix an tlan leh chauh ang.

Mercedes team boss Toto Wolff chuan, "Hamilton hi chu driver ṭha chungchuang a ni, hnehna a chan kan beisei ngam loh ni pawhin a chak ber a ni zel. Kan team pumpui kan hlimin kan lawm a, season chanve kan hman tawh chinah lawm lohna tur thil thleng a awm lo," a ti.

Tun hnaia driver hmuhnawm berte zinga mi Max Verstappen chuan, "Kei leh ka team chuan kan theihna sang ber kan hlan a, kan vanneih ni a la inher chhuak lo deuh mai chauh a ni. Dawhthei taka nghah a ngai, lungngaia indawmkun ngawt tur kan ni lo ang," tiin chak lo mah se a hnual phah loh thu a sawi.

Red Bull team boss Christian Horner chuan, "Mercedes khan vanneihna zawngin risk an la a, an tifuh hlauh mai a ni. Pakhatna chu kan ni lo ngei mai, amaherawhchu Max tlan danah kan lungawi tawk hle. Team lian dang kan elphak leh ta hi chanchin ṭha a ni," a ti.

Ferrari driver Sebastian Vettel chuan, "Lap 70 kan tlan a, a hmasa ber kha fal takin a thleng a nih chuan a mak lo. Mahse, team ṭha leh team ṭha inelah second 60 bawr vela inthlauh chu a zau lutuk deuh, hmasawnna tur kan ngah," tiin season chawhnu lamah ṭan lak an ngaih thu a sawi.