India tlangval an hlawhtling

Badminton huangah India a hmingṭha chho zel a, singles player ten beisei an phak hleihtheih loh karah mipa doubles player Satwiksairaj Rankireddy leh Chirag Shetty te chuan Thailand Open 2019-ah nomawi an chawi.

Pathiannia Bangkok-a final inkhelah Indian shuttler-te hi seeded chang phak lo an nih avangin rinkai an ni lo. Mahse, World champion mai bakah Asian Games leh World Tour Finals champion ni kawp bawk Li Junhui leh Liu Yuchen te ṭangdun chu 21-19, 18-21, 21-18 in an hneh.

Tun hmain Rankireddy leh Shetty te ṭangdun hian result lian tham an la nei ngai lo, season hmasa khan ram chhung inelna Hyderabad Open-ah erawh an lo champion tawh - Super 500 badminton championship hi an hlawhtlinna lian ber a ni.

Badminton national coach Pullela Gopichand chuan, "Anni pahnih hian season hmasa lamah pawh hnehna an chang lai ka hmu hnem tawh, nomawi an chawi loh vang khan an ṭha lo tihna a ni lo. Tunah erawh an ṭhatzia an nemnghet ta a, hlawhtlinna tam zawk an tawn zel ka duhsak," a ti.

Thailand Open-ah hian Saina Nehwal leh Kidambi Srikanth te pawh an inlan a, semifinal an thleng phak lo. Player langsar dang PV Sindhu erawh hun tepter tawh takah a inhnukdawk leh thut a ni.