Puanzar hawn a ni ta - a tawpah City

Lemchan pholan a nih dawnin puanzar hawn a ni ṭhin a, chumi nena hmeh bel chuan Community Shield hi English football-ah chuan puanzar hawnna inkhel tih a ni ṭhin. 

Pathianni zan khan puanzar chu season thar atan keu hawn a ni ta a, ennawm hmuhnawm tak chhawpsak nghal kan ni - a tawpah Manchester City an dingchang. Premier League leh FA Cup champion-in an khelh ṭhin Community Shield-ah Man City leh Liverpool an intawng a, hun pangngaiah 1-1 a an inhnehtawk hnuin penalty-ah 5-4 in City an chak. Pep Guardiola hote hi league leh Cup champion an nih kawp avangin Premier League-a pahnihna Liverpool nen an inkhel. 

Liverpool boss Jurgen Klopp-a'n inkhelh hmain Community Shield a ngaih pawimawh thu a sawi a, German coach-in a thusawiah a ti tak tak tih pholan nan a neih ṭhat dan berin player a rem. 

Reds tana bul ṭan zinga player pakua chu Champions League final-a first XI chang an ni a, Sadio Mane chu AFCON final vanga a la chawlh hahdam avangin a inlan lo. Roberto Firmino leh Mohamed Salah ten Pathianni zan inkhel hmain khelmualah minute tam la hmang lo mah se an talbuai lo a, inkhel ṭantir lamah goal khung theihna remchang an rawn nei nghal. 

Mahse, goal khung hmasa zawktu erawh City an ni a, a khungtu pawh an player hlui a ni. David Silva 'flick' ṭha zet chu Raheem Sterling-a'n a khung a, amah chher liantu Liverpool laka a goal hmasa ber a ni. 

Second half-ah Liverpool chu team ṭha zawk an ni a, Jurgen Klopp-a'n substitution a siam fuh tiin a sawi theih bawk. Minute 77-naah bench aṭanga luhtir Joel Matip chuan Virgil van Dijk cross aṭangin a tauh lut ta nge nge. 

Liverpool an phur sawt a, Premier League champion City an bet. Mahse, Liverpool-in an hun ṭha neih an chhawr thei ṭhin lo a, a tawpah an tawrh phah. Mohamed Salah chu mahni hmasial tiin sawisel theih a ni a, Egyptian forward hian goal khung a tum luatah 'awl' remchang zawkah a ṭhiante a hmu lo ṭhin niin a lang. 

Salah hian vawi khat post a pet per a, injury time-a a goal khung loh phei chu uiawm tak a ni - a tauh goal ngei tawh tur nia lang chu Kyle Walker chuan bicycle kick hmangin goalline aṭangin a pet chhuak hman!

Hun pangngaiah goal a luh zui loh avangin penalty hmanga chak zawk zawn a ṭul a, Reds tan Georginio Wijnaldum-a'n a pet goal lo - City lamin an pet goal vek thung. 

Manchester City an chak a, season hmasa ang thoin Community Shield nen bul an ṭan - he team hi Premier League-ah pawh rin kai ber an ni leh dawn tih a chiang a, an squad pawh a chhah hle. Season hmasaa hliam vanga inlan tam lo Kevin de Bruyne chu a thiam ngaiin a lo la thiam reng tih hmuh turin a awm a, Belgian midfielder hi Pep Guardiola tan a pawimawhna a zual zel dawn. 

Atletico Madrid aṭanga lakluh Rodri chuan City tan a match hmasa ber a khel a, Fernandinho 'role' a khelhtir midfielder hian tihsual nei mah se a khel chhe lo. City-ah a tal tam ang a, a thiamna kan la hmu dawn chauh ang. 

Best FIFA Men's Player chawimawina dawng tura rin hlawh Virgil van Dijk chu match 65 hnuah an bum ve ta - Dutch defender hi Gabriel Jesus chuan a bum a, March 2018-a Newcastle United midfielder Mikel Merino-a'n a bum hnua bumtu a neih leh hmasak ber a ni!

VVD hian 'bum' tawk mah se Matip goal khung tur a siamsak bakah goal khungna remchang a nei a, mahse a goal shot-in bar a per hnuah goal line-ah chiah a sawt. City lamah Sterling chu a 'changtupa' tia fak a phu rualin inhnehtawk chhanah a puh theih - English forward hian vawi hnih ngawt amah chauhin Alisson a hmachhawn a, a pet goal lo ve ve. 

Vawi khat post a pet per a, vawi khat erawh a sirah player pahnih pek tur a nei chungin a khalh lui a, Alisson-a'n a lo man sak hman. 

Liverpool-in Manchester City beiseina Champions League-a an tihtawp sak hnu leh, City-in Liverpool beiseina Premier League-a an tihtawp sak hnuah football club inhmelma thar an piang niah mi tam takin an ngai. Chumi belhchhah tur chuan club pahnihin khawvela manager 'hot' ber pawl Pep Guardiola leh Jurgen Klopp an kawl a, manager pahnih hian eng 'game' mah an ti mai mai ngai lo. 

Wembley-ah inkhel boruak a ṭang a, inkhelh hmain Klopp leh Pep hi 'ṭawngkamin' an indo der tawh bawk - Reds fan-ten an hlapui You'll Never Walk Alone an sak apiangin City fan-ten an au el a, City hlapui 'Blue Moon' chu Kop hoin an au el ve tho. 

Inkhel boruak 'hot' zia hrilhfiahna chu Pep a ni a, Spanish manager hi referee-in football dan thar hmanga 'yellow card' a pek ngai khawpin a khawsa - season hmasaa point khat leka inthlau team hi Premier League-ah inel ber an nih leh ngei a rinawm. 

A la chiang lo 

Manchester City manager Pep Guardiola chuan, "Team pahnihin final ṭha tak kan khel ve ve a ni. Eng team mahin 90 minutes chhung inkhel an thunun thei ngai lo. Hun tawp lam minute 15-ah khan kan chau deuh a, Liverpool kha chak thei an ni. 

"Team pahnih tan inzirna ṭha tak a ni a, player tan season thara an hmachhawn tur enchhinna ṭha a ni. Hetiang level-ah chuan danglamna hi penalty leh point khat lek te a ni ṭhin. Manchester United, Arsenal, Tottenham leh Chelsea an la awm bawk a, eng nge thleng zel dawn ka hre bik lo," a ti. 

Liverpool manager Jurgen Klopp chuan, "Kan khel ṭha takzet a, second half-ah a ṭha lehzual. Team pahnih hian pre-season in ang tak kan hmang. Inkhelh zawhah De Bruyne nen kan titi a, tun season-a kan club nihna tak hi kan la hrechiang lo ve ve. 

"Si phurh sut kha kan phu a, goal khat 'save' in engkim a ti danglam a ni. Hnehna chan ai chuan kan khelh dan kha ka ngaih pawimawh a ni a, football ṭha tak kan khel thei tih kan pholang," a ti a, a hnual duh lo.