MPL kaithar FC Venghnuai inlan hun

NEXAS Independence Day Celebration Football Tournament-ah MPL kai thar FC Venghnuai an inlan dawn a, vawiin tlai dar 2:15-ah Chawnpui FC an hmachhawn ang. Chhun dar 12:00-ah champion lai Chhinga Veng leh Ramhlun North FC te an inkhel bawk ang.

Ruahmanna hmasaah chuan FC Venghnuai khelh hun hi chhun dar 12:00 a ni a, amaherawhchu nimin khan an club vice president H. Zothanmawia chu stroke vangin a thi. Vawiin chhun dar 12:00 hian H. Zothanmawia hi vui tur a ni a, hemi vang hian tlai dar 2:15-ah an inkhelh hun hi sawnsak an ni. 

FC Venghnuai secretary F. Lalrinmawia (F-a) chuan, "MFA hruaitute, Organising Committee, Match Commissioner leh MPL Club hrang hrang ten kan lusunna min hriatthiampui a, kan khelh hun min sawnsak avangin inthlahrung tak siin lawmthu kan sawi mawlh mawlh e," tiin a sawi.

MFA Super Cup-ah group B aṭangin Chawnpui FC chiah an la inlan a, club dang pathum tan I Day Football hi tun season atana an bul ṭanna tur a ni. Top flight football vawi khat khelhna tur FC Venghnuai hmuh an châkawm zual hle. 

Venghnuai secretary F-a chuan, "I Day Football chauh ni loin MPL match hmasa ber hi Pu Mawitea hian hmu ve se kan ti hle a ni. Kum 2012-a kan club din a nih aṭangin OB nihna la chelh char char a ni a, club hruaitute chuan kan vice president kan chan hi pawi kan ti a, min ṭhawng tak zet. Hun hrehawm tak kan hmachhawn a, chutihrualin kan inkhel turah erawh min fuihphurtu ni thei hram se kan duh hle a ni," tiin Vanglaini a hrilh.

MPL club thar hi tualchhung football baka College football leh futsal thlenga inhnamhnawih Rindika Hmar hoin an thawk chhuak dawn a, rawlthar ṭha la khawmin tawnhriat nei ṭha nen an chawhpawlh. FC Venghnuai tan hian season liam taa Chawnpui FC tana khel ṭha tak Vanlalthanga chu player langsar an ni a, an khelh ṭhat niah chuan eng team pawh hneh thei an ni ang.

Chawnpui FC lamin MPL hmasa bera Dinthar FC champion puitu HC Zarzoliana an lalut a, anni hian Ramhlun South player ṭha hui khawmin team ṭha tak an din ve bawk. MFA Super Cup-ah Chawnpui hian champion zui ta Mizoram Police hneh lo mah se 11 ve vea an khelh laiin 1-0 a hmahruaitu zawk an ni a, FC Venghnuai lakah pawh buk rit zawk tura ngaih an ni.

Chhinga Vengin coach Lalsangzuala Hmar hnuaiah hlawhtlinna ṭhahnem tak an chang a, Mizo coach Sanga hian Electric Veng FC a pan san tak avangin coach Lalremruata leh Anand Gurung te hnuaia Chhingcows kalzel dan tur hian ngaihven a hlawh hle.

Vawiina inkhel tur Chhinga Veng leh Ramhlun North te pawh hian chanchin ngaihnawm tak an nei bawk. Chhingcows hian Ramhlun North hi first division-a an awm ho lai aṭang tawhin hneh an harsat a, an intawn hmasak match sarihah an chak zawh loh hnuin September 21, 2018 khan a vawi khat nan an hneh ve chiah. MPL7-ah hian an intawn vawi hnihnaah pawh Chhinga Veng an chak leh bawk.

Chhinga Veng hian Ramhlun North laka an sulhnu ṭha lo hi an nuai reh tawhah an ngai a, mahse mak takin kumin CYMA Football-ah Ramhlun North-in Chhinga Veng an hneh leh khauh. Hemi ṭuma Chhinga Veng enkawltu Remruata hi tun ṭuma an veng club enkawl tur tho hi a ni a, I Day Football champion lai hi pressure nei sain an khel dawn tihna a ni.