AIFF League Committee-in Futsal C'ship an rel

AIFF League Committee Meeting chu February 5, Zirtawpni zan khan video conferencing hmanga neih a ni a. AIFF senior vice chairman Subrata Dutta hoin committee hi neih a ni a, meeting-ah hian AIFF general secretary Kushal Das, League CEO Sunando Dhar, Lalnghinglova Hmar, Souter Vaz, Anil Kumar, Chirag Tanna, Rochak Langer leh AIFF deputy general secretary Abhishek Yadav te an tel a ni.

Covid-19 vanga a hun sawn AIFF Club Futsal Championship hmasa ber tur chu June-July thlaa neih turin an rel. Inelna a tel duh State Association-te chu an state aiawh tur zawng turin June 2021 thleng hun an pe. AIFF Club Futsal Championship-ah hian state tin champion bakah Hero ISL leh Hero I League club te pawh tel tura sawmna thawn an ni ang.

Committee hian Hero 2nd Division League chu inelna hmun khatah April/May 2021 chhunga neih turin an rel a. Hmeichhe inelna Hero Indian Women’s League 2020-21 pawh May 2021 hmaa neih tum a ni.