Vawiinah Australian Open 2021 Novak Djokovic inlan dawn

Tennis season khat chhunga Grand Slam hmasa ber Australian Open 2021 chu vawiin aṭang hian Melbourne Park-ah khelh ṭan a ni dawn. Mipa singles champion lai Novak Djokovic chuan tlai lamah a match hmasa ber a khel ang.

Inelna hi coronavirus vangin a hun pangngai January thla khan khelh theih a ni lo, tunah hian hri leng la reh chiah lo mah se stadium chhungah entu fans an lut thei dawn. Season dang anga stadium khata ṭhut erawh a rem dawn lo, player au phur tham erawh an awm dawn.

Kum 1905 aṭanga khelh ṭan Australian Open-ah hian record nei ṭha ber chu Djokovic a ni. Serbian star hian vawi riat ngawt nomawi a chawi tawh, kuminah hian seeded pakhatna pek niin champion tura rinkai ber a ni.

World number 1 Djokovic chuan, "Melbourne Park-ah hian vawi 17 ka inlanna tur a ni, mahse match tin maiah hian ka la hlauthawng deuh ziah, a nihna takah chuan zam lo leh inringtawk tak chunga court chhunga luh hi a awlsam lo.

"Chutihrualin tawnhriat ka ngah tawk tawh a, kuminah pawh hian beiseina sang tak ka nei," a ti. Djokovic hian major title 17 a la tawh a, vawi 20 la tawh Roger Federer leh Rafael Nadal te nena inel chu nuam a tih thu a sawi bawk.

Season hmasa khan Djokovic hi Dominic Thiem lakah 2-1 in hniam hman mah se tho chhuak lehin a champion. Kuminah hian Austrian star hi final hmain a hmachhawn thei dawn a, ani bakah hian 2014 champion Stan Wawrinka leh Alexander Zverev te a hmachhawn thei dawn.

Theihna a nei sang a, Thiem hi a kum rualpuite chungah leng mah se Federer, Nadal leh Djokovic ten an dip ral mai dawn niin a lang hman. Mahse, Grand Slam final a khelh hmasak pathuma a tlawm hnuah season hmasa khan US Open title a la.

Seeded pathumna Thiem chuan, "Nikum khan Australian final-ah set nga kan khelh hnuin ka chak lo, a hnu lamah hri leng vangin kan inkharkhip zui char char a nih kha, khang lai khan rilru hrehawm leh zalen lo takin ka awm.

"Mahse buaina karah US Open kan khel a, hlawhtlinna ka chang hlauh khan ka rilru tawt chu a la kiang. Tunah chuan inelna liana hlawhtling turin inrintawkna ka nei nghet tawh," a ti. Vawiin chhunah Thiem hian Mikhail Kukushkin a hmachhawn ang.

Inelna ṭan nia inlan tur zingah Djokovic leh Thiem ten ngaihven an hlawh a, chutihrualin tawnhriat ngah Grigor Dimitrov leh US Open champion hlui Marin Cilic te inkhel tur chu a hmuhnawm tura ngaih a ni bawk.

Gael Monfils    05:30 AM    Emil Ruusuvuori

Federico Coria    05:30 AM    Milos Raonic

Stan Wawrinka    06:30 AM    Pedro Sousa

Dominic Thiem    08:00 AM    Mikhail Kukushkin

Grigor Dimitrov    08:45 AM    Marin Cilic

Elias Ymer    10:30 AM    Diego Schwartzman

Novak Djokovic    02:45 PM    Jeremy Chardy

Denis Shapovalov    02:45 PM    Jannik Sinner

Anastasia Pavlyuchenkova    05:30 AM    Naomi Osaka

Bernarda Pera    06:45 AM    Angelique Kerber

Laura Siegemund    06:45 AM    Serena Williams

Iga Swiatek    07:30 AM    Arantxa Rus

Ons Jabeur    09:00 AM    Andrea Petkovic

Bianca Andreescu    10:30 AM    Mihaela Buzarnescu

Aryna Sabalenka    10:45 AM    Viktoria Kuzmova

Lizette Cabrera    01:30 PM    Simona Halep