Man United-in point hnih an hloh

Old Traffford-ah Dominic Calvert-Lewin-a'n hun pek belh tawp hma hretin goal a khung a, Manchester United leh Everton te 3-3 in an inhnehtawk. Ole Gunnar Solskjaer-a hoten point thum hmun theihna hun ṭha bawhpelhin point hnih an hloh.

Inrinni zian inkhelah Edinson Cavani leh Bruno Fernandes te hmangin first half-ah Man United-in 2-0 in hma an hruai a, Everton-in Adoulaye Doucoure leh James Rodriguez te hmangin second half-ah siphurh an sut. Mualneitu lamin Scott McTominay tauh luh hmangin hma hruai nawn mah se injury time-ah Toffees-in Calvert-Lewin hmangin si phurh an sut nawn.

Solskjaer-a hoten match 23 aṭangin point 45 an hmu a, an chungah anni aia khel tlem zawk Manchester City an awm. Pep Guardiola hote hian nizan khan Liverpool an hmachhawn a ni.

Uruguyan striker Edinson Cavani-a'n hmun pawimawh a chang chho a, Everton nen pawh United goal nawrna ber pakhat a ni. Minute 24-naah Marcus Rashford-a cross ṭha zet chu Cavani-a'n a tauh goal.

Solskjaer-a hoten inkhel an thunun a, minute 45-naah Bruno Fernandes-a'n box pawn aṭangin fing takin a pet goal leh bawk. Southampton laka goal kua khung zo hlim United goal nawr a na a, Old Trafford-ah awlsam takin point thum an hlawhchhuak turah a ngaih theih.

Amaherawhchu second half ṭan aṭanga minute lina lekah David de Gea tihsual zarah Abdoulaye Doucoure-a'n Everton tan siphurh a sut ṭhen a, James Rodriguez-a'n tlarhnung phui ṭhat loh avangin minute 52-naah siphurh a sut zo.

Minute 70-naah Luke Shaw freekick pet chu Scott McTominay-a'n a tauh goal a, Premier League champion tum tan chakpui ngei tur ni mah se Solskjaer-a hoten a tawp an thleng zo lo. Injury time-ah pawh hun pek belh leh chhawngah Lucas Digne freekick pet chu ven ṭhat tawk loh Calvert-Lewin-a'n a pet goal a, Everton-in Old Trafford-ah point khat hlu tak an hlawh chhuak.

Manchester United erawh kawng tam takah ṭhatna lai nei mah se an tlarhnung a phui tawk lo a, champion tur khawpin an rilru a paukhauh tawk lo niin a lang. Everton laka point thum an hmuh loh chhanah puh tur dang an nei lo a, an thiam loh a nih miau avangin an elpui Manchester City nen huang khata dah an harsa hle.

Manchester United manager Solskjaer chuan, "Chak kan phu a, mahse football a ni miau si. Chance kan hmang ṭangkai tur a ni a, kan lama ball an pet zawng zawng kan chhuah tur a ni lo," tiin a lungawi loh thu a sawi. Everton hian United goal-ah vawi thum an pet a, a goal vek.

Solskjaer chuan sawi chhunzawmin, "Inkhela ball pet hnuhnung berin ka ha (teeth) a per a ni ber a, rilru na ngawih ngawihin kan haw a ṭul phah. Chutihrualin 3-2 a nih hnuah pawh goal lina khung kan tum a, fan-te pawhin team angin chak duhna kan nei tih chu an phu ang," tiin a sawi.

Everton boss Carlo Ancelotti chuan, "Inkhel danglam tak a ni a, sawi dan tur pawh ka thiam lo. Chak ang mai kan ni a, point khat chauh kan hlawh thung. Premier League team ṭha ber zinga mite kan elpha. Theihna aṭanga thlir chuan keini aia sang a ni a, amaherawhchu kan theihna angin kan bei tawk a ni," tiin a player-te thawhrimna a fak.

Paul Pogba-a'n Manchester United leh Everton inkhelh ṭumin bul a ṭan a, French midfielder hi minute 39-naah a inhliam avangin Fred-a'n a thlak.

Ole Gunnar Solskjaer chuan, "Malpui a ni a, tihrawl hliam ni turah kan ngai. A inhliam dan chiah hre turin endik a ṭul dawn a, a dam thuai ka beisei," tiin a sawi.

Pogba hi January thla khan United player of the month-ah an thlang a, Fulham laka goal khung chu goal of the month-ah an thlang bawk. French midfielder hian tun season-ah match 28 a inlan tawh a, goal li khungin assist vawi thum a nei tawh a ni.