Dal theih loh Rafael Nadal

Rafael Nadal chuan nimin tlai khan Frances Tiafoe chu darkar khat leh minute 47 chhung lekin 6-3, 6-4, 6-2 a hnehin Australian Open semifinal a lut a, Open Era bikah Grand Slam palia vawi khat aia tam champion kim thei awmchhun nih a tumna chu a chhawmnung. January 24 hian Stefanos Tsitsipas nen final luh inchuhin an inkhel leh ang.

Rod Laver Arena-a inkhelah toss a vannei zawk Nadal-a'n service hmasain, ṭum dang ang lo takin game hmasa berah aces vawi hnih a siam nghal. Break point a hmuh hmasak ber chhawr ṭangkai nghalin a dinhmun a sawhnghet nghal.

Set hnuhnung pahnihah pawh Nadal a nghing lo, Spanish tlangval hian a service a hum vek. American tlangval nen an vawi khat intawnnaah hniam lai nei miah loin a chak tlang a, champion tura rinkai a ni zui zel bawk.

Grand Slam vawi 17 champion tawh Nadal hian kumin Australian Open bikah hian match nga a khelh chinah set a la hloh miah lo a, inelna lian hi kar hnih chhung khelh ṭhin a nih avangin atan chuan straight set a hnehna chan zel hi chanchin ṭha a ni.

Nimina mipa singles quarterfinal inkhel hmasa zawkah Stefanos Tsitsipas chuan darkar thum leh minute 15 chhungin Roberto Bautista Agut chu 7-5, 4-6, 6-4, 7-6 (7-2) a hnehin a vawi khat nan Australian Open semifinal a lut.

Greek tlangval hian a match hmasa zawkah champion lai Roger Federer a hneh tawh bawk a, kum 20 leh ni 168 mi niin Australian Open mipa singles player la dam lai zinga naupang ber a ni.

Seeded 14-na Tsitsipas chuan, "Thawnthu ngaihnawm tak ang ni maiin ka hria, ka suangtuahna ramah ka cheng mek a, he hun tawng tur hian ka lo bei ngawrh tawh ṭhin," tiin a sawi. Federer a hneh aṭang khan Greek player zingah Tsitsipas hi Grand Slam bika thleng sang ber a ni nghal zel tawh.

Australian Open hmeichhe singles semifinal khel tur pahnih a chiang. Nimin khan Petra Kvitova leh Danielle Collins te chuan quarterfinal an paltlang a, anni pahnih hi January 24-ah an intawng zui leh ang.

Seeded parukna Kvitova hian tualchhung player duhawm Ashleigh Barty chu 6-1, 6-4 in a sawp, inelna a zawh meuh chuan chawlh kar 48 chhung world number 1 ni tawh Simona Halep khumin a chung berah a awm dawn.

Inkhel dangah Danielle Collins hian a vawi khat nana Australian Open semifinal lut turin Anastasia Pavlyuchenkova chu 2-6, 7-5, 6-1 in a hneh ve bawk a, hnehna chang tur hian darkar hnih leh minute 16 chhung hun a hmang.

Kum 25 mi Collins-i'n set hmasa ber a hloh hnuah, set hnihna an khelh tirh pawhin a service vawi hnih a hloh. Mahse, world number 35 hian a tawp lamah a zawna game sarih lain huaisen takin hnehna a chang let.