Churchill khingpui tur Real Kashmir

Zanin dar 7:00 hian Kishore Bharati Krirangan-ah I League hmahruaitu Churchill Brothers-in an hnuai chiaha awm Real Kashmir an hmachhawn dawn. Churchilll leh Kashmir hian hneh loh an la tawng lo a, zanin hian league hmahruaitu an zawng dawn. 

David Robertson-a enkawl Kashmir hi an goal difference a ṭhat zawk avangin zanina point thum an hlawh chhuak a nih chuan pakhatna an ni thei dawn a, chutihrualin I League team te an intluk tawk a, an dinhmun pawh a inthlau lo hlawm hle. Churchill hian an match hnuhnung berah Aizawl FC nen goal awm loin an inhnehtawk a, hemi pawh hi pakhatna leh pahnihna inkhel tho a ni.

Point khat chauh hlawhchhuah avangin Mizo club hi panganaah an awm leh rih a, chuvangin league match khat lekah table a danglam nasa ṭhin tih hriat a ṭha. Real Kashmir erawh match khata an khelh tlem avangin tun ṭumah hian point khat chauh an hlawh chhuak a nih pawhin khelh zat inangah pakhatna dinhmun an la hauh leh thei dawn.

Kashmir club-ah hian Mizo tlangval Sena Ralte chuan hmun pawimawh a chang a, Churchill lamah Vanlalduatsanga'n inkhel bul a ṭan ṭhin bawk. Churchill striker Clayvin Zuniga-a'n goal nga khung tawhin top scorer a ni mek a, Aizawl FC lakaherawh hliam vangin a inlan thei lo. Kashmir tan coach David-a fapa Mason Robertson chu an innghahna ber a ni.

Tun season I League-ah hian vawi khat ṭheuh an inkhelh kual zawhah a sang parukin champion tur an zawng ang a, a hnuai pangain relegate tur an zawng dawn.