Thlawhtheihna boah Sala a chuang

Cardiff City-in tun January transfer-a an player manto ber tura an lakluh Emiliano Sala chu a chuanna thlawhtheihna Piper Malibu chu France leh Cardiff inkarah a bo a, Argentine forward hi a chuang ngei tih French Civil Aviation chuan an nemnghet tawh.

Welsh club hian kum 28 mi Sala hi Nantes aṭangin an lalut a, an lakluhna hi kum 2013-a Chile international Gary Medel an lakna pound maktaduai 11 aiin a man hi a tam zawk. Argentine forward Sala hian Ligue 1-ah goal 12 khungin tun season-ah goal 13 a khung tawh a, league bikah hian Kylian Mbappe leh Nicolas Pepe te chiah a tluk lo.

Cardiff hian Inrinni khan Sala an lakluh thu hi an tichiang. Thawhṭanni khan Nantes aṭangin Wales lam panin a thlawk chhuak a, thliarkar Guernsey a pelh lai velin harsatna an tawk ṭan a, hetah hian feet 2,300 vela an thlawh laiin biak theih loin an awm zui a, an awmna hi English channel vel a ni. Hetihlai hian ruah a sur a, thli tleh ve bawk mah se chetsualna khawp tur ni chuan a lang lo.

United Kingdom ram chan china mawhphurtu Her Majesty’s Coastguard chuan a bona hmun hi an chan chin ni lo mah se a pui turin helicopter pahnih an thawn thu an tarlang a, a thlawhchhuah vawi khatnaah thlawhtheihna hnu hma an hmuh loh thu an tarlang bawk. 

Piper Malibu hi thlawhtheihna te a ni a, pilot bakah mi panga chuan theihna a ni. Cardiff panah hi chuan Sala bakah mi pakhat dang an chuang nia hriat a ni. Argentine forward hian Cardiff a pan hma hian Nantes a tlawh leh phawt a, twitter-ah a ṭhiante nena an thlalak pho chhuakin Nantes a mangṭhana chu a ziak a, tunah erawh Sala hi biak theih a ni tawh lo a, he thu ziah lai hian thlawhtheihna hi hmuh a la ni lo.