Barcelona player thar Prince Boateng

Spanish champion Barcelona-in thlasik transfer-ah khawvel an barakhaih a, rin loh takin Sassuolo forward  Kevin-Prince Boateng chu season tawp thleng an hnena khel turin an lalut. 

Barcelona hian Paco Alcacer leh Munir El Haddadi an hralh avangin an striker rinrawl Luis Suarez thachhang dawltu tur an mamawh a, Boateng hi an mamawh chhanna a nih beiseiin an lalut ta a ni.

Catalan club hi hming langsar tia sawi tur ni lem lo Girona striker Cristhian Stuani, Arsenal striker hlui Carlos Vela, Chelsea striker pahnih Olivier Giroud leh Alvaro Morata bakah Tottenham striker Fernando Llorente te nen pawh sawi zawm an ni hman. 

Kum 31 mi Boateng chuan, "Ka tan chuan mang ram thleng dik ang mai a ni a, chawimawina ropui tak a ni," tiin Barcelona a zawm thei chu a duhthusam a nih thu a sawi - Barca hian an duh a nih chuan kum tawpah pound maktaduai 7.1-in a nghetin an lalut thei ang. 

Hertha Berlin aṭanga bul ṭantu forward hian Tottenham, Borussia Dortmund, Portsmouth, Genoa, AC Milan, Schalke, Las Palmas leh Eintracht Frankfurt tan a khel tawh a, Sassuolo tan tun season-ah match 15 khelin goal 15 a khung tawh. 

Germany a piang, Ghana mi leh sa a nih avanga Ghana tana inlan thlangtu forward hian ram tan match 15 a khel tawh a, a unaupa Bayern Munich defender Jerome Boateng erawh Germany tana khel niin 2010 leh 2014 World Cup-ah khan an lo inhmachhawn tawh. 

Transfer bazar-a Barcelona nena sawizawm striker te enin Catalan club hian Suarez thachhang dawl tur 'tak tak' an zawng tih a chiang a, coach Ernesto Valverde chuan Boateng chu an mamawh chhanna a nih thu a sawi. 

Spanish coach chuan, "La Liga-a insiam rem turin hun a mamawh tam dawn lo a, kan chhawr duh a nih pawhin a hman nghal theih dawn a ni. Central striker-ah emaw striker thachhang dawltu emaw, a tawlh hnung deuh pawhin chhawr theih vek a ni," tiin a fak hle. 

Boateng hian Las Palmas tan khan La Liga-ah season khat hun a hmang ve a, match 28-ah goal 10 a khung sak - La Liga khelh hi a tan thil thar a ni dawn lo.