Soucek red card sawisel a hlawh

Inrinni zan khan Craven Cottage-ah Fulham leh West Ham 0-0 in an inhnehtawk a, injury time-a Mike Dean-a'n Tomas Soucek a hnawhchhuah danin sawisel a hlawh hle.

Hun pek belhah Hammers-in freekick an pet dawn a, Fulham striker Aleksandar Mitrovic a tluk avangin referee-in thil thlen dan a enfiah. West Ham midfieder Soucek kut la sawn tur chuan a kiuin Mitrovic a nghawk fuh palh a, hemi a nih avang hian VAR hmangin thil thlen dan hi ennawn a ni.

VAR official Lee Mason-a'n thutlukna siam a harsat avangin referee Dean-a'n mual sir aṭangin thil thlen dan a ennawn. Rei ngial a en hnuah Dean-a'n red card a phawrh a, Soucek hnawhchhuah a ni. 

West Ham manager David Moyes chuan, "VAR enkawltu kha tu pawh ni se a chet dan hi a zaththlak ka ti a, Mike Dean pawh a tawnhriat ngaihtuahin a thutlukna a zahthlak ka ti. Tihpalh a ni tih chiang takin a lang vek a ni," tiin thutluknaah a lawm lo hle.

Fulham boss Scott Parker chuan, "A tuartu tan chuan a na khawp ang, red card turah ka ngai lo. Mahse, tuna kan football kalpui dan chu a ni si," tiin Moyes a ṭawmpui thu a sawi. 'Violent conduct' a nih avangin Soucek hi match thum hrem tur a ni a, FA Cup-a Manchester United nen an inkhelh tur bakah Sheffield United leh Tottenham te a hmachhawn thei dawn lo.