Real tana goal hnih khungtu defender Varane

Spanish champion Real Madrid chuan La Liga table mawngphah luahtu Huesca chu khualmualah 2-1 in an hneh hram a, defender Raphael Varane chuan goal hnih a khung. 

Huesca hian Javi Galan hmangin goal hmahruai an khung a, mahse Varane chuan goal hnih hmanga chhangletin a team hi hnehna a chanpui. 

Real Madrid-in hnehna an chan avangin table-ah pahnihnaah an chho a, hmahruaitu Atletico Madrid chu point sarihin an phak lo mek - match hnihin an khel tam thung. 

Atletico Madrid hian zanin dar 1:30-ah league match an khel dawn a, table-a 10-na dinhmun luah mektu Celta Vigo an mikhual ang. 

Team 20 inelna La Liga mawngphahah Huesca an awm a, Real Madrid erawh champion lai an ni thung. Mahse, rin loh takin goal khung hmasatu erawh mual neitu Huesca an ni tlat. 

League match 21 an khelh tawha vawi hnih chiah la chak team tan hian Javi Galan chuan minute 48-naah goal hmahruai a khung a, Leicester City forward hlui Shinji Okozaki siamsak a ni. 

Mak tiin Real an hawihai a, an thin phu pawh a reh hman lo - goal an chhuah hnu lawkah Wolverhampton Wanderers aṭanga loan-a Huesca pantu Rafa Mir chuan bar a rawn tih per dawp!

Real fan-ten hlauthawngin inkhel an thlir zui a, an tlawm leh chuan Atletico Madrid nen an inkar a zau mah mah tawh dawn tih an hria. 

Real fan-ten an hlauhthawn laiin player-te erawh an beidawng ve lo a, goal an chhuah aṭanga minute ruk hnu lawkah fan-te rilru hah zualpui tih reh nan Varane chuan si phurh a rawn sut. 

Real goal hi Karim Benzema ke aṭanga chhuak a ni a, French forward hian freekick hmangin bar a tih per - a per lehlam chu Varane hian a lo tauh lut a ni. 

Madrid khaw club-in point khata lungawi mai an tum lo. Hun tawp nan minute ruk chauh a awm tawh tihin Varane bawk a inlar a, French defender hian chakna goal a rawn khung. 

Casemiro ball tauh chu Huesca keeper Alvaro Fernandez chuan a lo dang a, a per lehlam hi Varane ke bulah tak tlain goal-ah a chantir. 

Real hi inelna hrang hranga an match hnuhnung pasarihah vawi hnih chiah an chak a, an chak loh zingah Athletic Bilbao-in Spanish Super Cup semifinal aṭanga an petchhuah leh third division club Alcoyano-in Copa del Rey round of 32 aṭanga an petchhuah chu a tel. 

La Liga lama result ṭha lo piahlamah inelna pahnih aṭang ngawta petchhuah an nih hian Zidane-a dinhmun a ti ṭha lo lehzual a, French manager dinhmun hi a derthawng hle nia sawi a ni - Huesca lakah chak mah se an khelh dan enin Zidane tan thlamuang taka mut chi a la ni lo.

Kum 48 mi coach hian Huesca an hmachhawn hmaa media-te nen an inkawmnaah, "Media hoin ka chanchin in sawi dan hi ka phu lo. Season hmasa lawk khan league champion kan ni a, zah ve deuh ka phu a ni," a ti. 

Media hoin a chanchin an sawi danah Zidane a lawm lo a, "Season khat tal hun min pek belh ta che u," tiin a sawi belh hial - mahse, thusawi aiin thiltih a ring ṭhin a, Huesca lakah chak mah se an khelh dan hian Zidane tan thu lawmawm a thlen lo ang. 

Real Madrid hian Huesca hi captain Sergio Ramos leh player man to Eden Hazard tel loin an hmachhawn a, player pahnih hi hliam vanga inlan thei lo an ni. 

Spanish Super Cup-a Bilbao an ngam loh hnua inlan leh tawh lo Ramos hian a khup hliam a zai tir a, Spanish defender hi zai hlawhtling mah se a chawlh chen tur erawh Real-in an puang lo thung. 

Zidane chuan, "Ramos hian rilru hahdam taka a awm theih nan zai hi a mamawh a, tluang taka an zai avangin ka lawm hle. A rang thei ang bera a lo kir leh theih nan theihtawp a chhuah zui ang," a ti. 

Hetihlai hian Eden Hazard chu tihrawl na vangin a chawl mek bawk a, Zidane chuan pound maktaduai 150 man forward hi, "Kar hnih thum velah chuan a lo kir mai ang," tiin a sawi tawh - Hazard hi a club hlui Chelsea chuan lak kir an tum dawn niin khawthlang media-te chuan thu an theh darh mek.