Champions League khelh tum Sevilla

Sevilla chuan season tharah Champions League khelh ngei an duh dawn tih khelmualah an pholan chhunzawm zel a, Inrinni zan khan Getafe chu 3-0 in an hneh. 

Real Madrid boss hlui Julen Lopetegui enkawl team hian first half-ah goal khung lo mah se chawlhlawk an hman hnuah an thiam thil an pholang a, second half-ah goal thum ngawt an khung. 

Sevilla tan hian Munir El Haddadi, Papu Gomez leh Youssef En-Nesyri te chuan goal khat ṭheuh an khung a, Getafe-in a chhanletna tur an nei lo. 

Inelna hrang hranga an match hnuhnung paruka chak tawh Sevilla tan Youssef En-Nesyri chuan a chet ṭhat a chhunzawm zel a, tun season inelna hrang hrangah match 31 khelin goal 17-a khung tawh.

Sevilla top four beiseina chhi nung zel tur chuan  Youssef En-Nesyri chet ṭhat zel hi a pawimawh dawn - he thu buatsaih lai hian table-ah pathumna an ni mek. 

Barcelona chu nizan khan Real Betis khelmualah an leng a, he thu buatsaih a nih lai hian result kan hre hman lo - result a zirin Real Madrid leh Sevilla tlanpelin pahnihna an ni leh thei ang.