MFA Women's League Club nei duh tan hmun ruak a la awm

Mizoram Football Association Women's League chu February 19, 2019 aṭanga khelh ṭan turin inbuatsaihna a kal mek a, team din duh tan hmunruak a la awm.

Women's League-ah hian team pariat an awm dawn a, team nei duh tan chuan tun hi neih theihna hun ṭha a ni. Team awm sa a awm lo a, a duh apiang tan team a din theih. 

League hi Aizawla khelh tura ruahman a ni a, Mizoram chhunga sorkar department /district/khua/veng/mipa football club awm sa - sporting club/MHIP/YMA/ college/school/mimal tu pawhin team an din thei a, MFA Women's League Board inkaihhruaina an zawm a ngai thung.

MFA Women's League-a team din duh tan team tel turte hriat tur pawimawh inziahna chu MFA Office, City Park-ah lak chhuah theih a ni a, dilna hi January 31 hmaa thehluh tur a ni. Dilna hi pariat aia tam a lut a nih chuan MFA Women's League Board-in a tel tur team pariat hi a thlang chhuak dawn a ni.

MFA Women's League Board chuan Mizorama player ṭha 32-te an la chhuak dawn a, hengte hi team pakhatah pali aia tam an awm thei lo ang. Team pariatte hian heng player 32 aṭanga an player pali tur hi a pawhin an pawt dawn a ni.

Mizoramah hmeichhe footballer an la ṭhahnem tawk lo a, team pakhatin player ṭha an lak khawm bik lohna turin player ṭha 32-te hi a rualkhai thei ang ber tura sem an ni ang. Team pariatah hian player thlan chhuah zinga pali zel hi an insem rual dawn a ni.

He League hi Mizoram hmeichhe player-te hmasawnna tura an puala siam a nih avangin state pawn player-te khelh phal a ni lo ang.

Mizoram chuan nikum khan Junior Girl's National Football Championship 2018-ah semifinal an thleng a, kar liam taa neih zawh Khelo India Under 21 girls football-ah bronze medal an la leh bawk.

MFA Women's Committee chairman Lalruatsanga Tochhawng chuan, "Mizote hi chuan theihna hi chu ka nei chiang a ni. MHIP nen ṭang kawp a, veng-veng inelna kan siam ṭum pawh khan a tute pawh mai kha an thiam em em vek mai a ni. Thenzawl lama hockey khel te, SAI a awmte leh tualchhung football-a kan la hriat ngai loh ṭha tak tak an tam hle," tiin Vanglaini a hrilh.

Women's Committee chairman chuan sawi chhunawmin, "National Junior Girls leh Khelo India-a kan result hian min tiphur a, Women's League hi a hlawhtlin chuan kan ṭhenawm Manipur angin national team-ah player ṭhahnem tak kan thawh thei ang. Chuvangin Mizoram hmeichhe football-in hma a sawn theih nan NGO hrang hrang te, zirna leh mimal ang pawhin kan penchhuah a ṭul a ni," tiin team nei turin a sawm.

Inelna hi February-April, 2019 chhunga khelh tura ruahman a ni a; team awm zawng zawng hi vawi khat ṭheuh an inkhel kual chhuak ang a, a tawpa point hmu sang paliin semi final an khel ang.

Team tinah player 16 aia tlem lo, 20 aia tam lo an awm thei ang a; Mizo hmeichhe footballer an la ṭhathnem tawk loh avangin player ziah luh theih zat hi 20 aia tam lo tura tih a ni.

Inkhel hi 35+10+35 minutes khelh tur a ni a, kar khatah vawi khat emaw vawi hnih emaw khelh ṭhin tur a ni ang.

MFA Women's League-ah hian team tel zawng zawngin lawmman an dawng ṭheuh ang. Champion-in Rs 50,000 an dawng ang a, pahnihnain Rs 25,000 an dawng ang a; hei bakah hian pariatna thlengin pawisa fai lawmman an dawn theih dan tur ruahman a ni.