A thiam pariat zingah Australia

Asian Cup champion lai Australia-in an nomawi humhim turin hmalam an pan zel a, Thawhṭanni zan khan team ṭha Uzebkistan nen goal khung loa an inhnehtawk hnuin penalty hmangin 4-2 in an chak a, quarterfinal an lut. 

Japan-in last 16-a tla tur chuan an ṭha mah mah tih an pholang a, Saudi Arabia chu 1-0 a hnehin a thiam pariat zingah an inhlangkai ve leh ta bawk - Japan hian quarterfinal-ah Vietnam an hmachhawn ang. 

Inelna thlengtu UAE-in hma taka Asian Cup tawp san mai an tum bik lo. Kyrgyzstan nen hun pangngaiah 2-2 a inhnehtawkin extra time hial khelh ngai mah se a vannei zawkah an ṭang a, minute 120 a zawh meuh chuan 3-2 in an chak. 

Japan laka tlawm hlim Uzbekistan-in Australia hnawhchhuah theih ngei inbeiseiin khel mah se an hun ṭha neih hmasak berah an striker chhuanvawr Eldor Shomurodov chuan a hun neih a chhawr thei lo. 

Match hmasa pathuma goal li khungtu Shomurodov bakah hian Javokhir Sidikov leh Dostonbek Khamdamov ten hun duhawm tak an nei bawk a, mahse Uzbekistan vanneih ṭum a ni lo. 

Australia-in zawi muangin hma an sawn a, Sydney left back Rhyan Grant, Perth Glory attacking midfielder Chris Ikonomidis, Celtic attacking midfielder Tom Rogic leh Hertha Berlin midfielder Mathew Leckie ten hun ṭha an khawhral vek!

Minute 90 chhung team pahnihin goal an khung lo a, minute 30 dang pek belh an ni chung pawhin an khung chuang lo. Goal hmaah Australia an vannei tawk lo tiin a sawi theih a, Uzbekistan tan goalkeeper Ignatiy Nesterov chu player langsar a ni. 

Minute 120 chhung goal a luh loh miau avangin penalty hmangin chak zawk zawn a ni a, Australia keeper Mathew Ryan tan hming chher ve hun a ni.

Brighton & Hove Albion goalkeeper hian Islom Tukhtakhujaev leh Dostonbek Khamdamov te pet chu dangin Australia hi hnehna a chanpui a, penalty-ah hian 4-2 in an chak. 

UAE-in tun tournament-ah hun pangngaia chak chu vawi khat chiah an nei - India an hneh kha a ni. Thailand leh Bahrain an inhnehtawkpui a, point nga nei chungin last 16 an lut. 

Kyrgyz Republic nen pawh minute 90 chhung chu goal hnih ve ve khungin an inhnehtawk a, mahse minute 103-naah penalty an hlawh chhuak hlauh a, Ahmed Khalil chuan hei hi goal-ah chantirin 3-2 in an chak. 

UAE hian minute 14-na lekah  Khamis Esmaeel hmangin hmahruaina goal an khung a, mahse Kyrgyz tan Akhlidin Israilov chuan a chhanglet. Ali Mabkhout-a'n UAE goal hnihna a khung hnuah an chak mai dawn niin lang mah se Tursunali Rustamov chuan injury time-ah a sut nawn - extra time-ah erawh UAE vanneihna a her chhuak a, goal khat khung belhin 3-2 in an chak ta a ni.

Japan-in minute 20-na leka Takehiro Tomiyasu goal tauh luh chhawr ṭangkaiin Saudi Arabia lakah 1-0 in hnehna an chang a, khel ṭha lo zawk nichungin quarterfinal an lut. 

Valencia boss hlui Juan Antonio Pizzi enkawlna hnuaia khel Saudi hian an hun ṭha neih an chhawr theih loh chu an tuar a, minute 15-a tlinin hmahruai thei ni tawh mah se Abdulaziz Al-Bishi leh Hussain Almoqahwi ten holam takin an hun ṭha an khawhral.

Saudi hian first half-ah ringawt pawh 70% ball an nei chungin goal an zawng hmu zo lo a, Hatan Bahebri  leh Salem Al Dawsari te pawhin chance an nei chungin goal an khung thei lo - a tawpah Japan an chak a, vannei zawkah an ṭang.