February-ah Misl-intat a chhuak dawn

Arsenal tana mi ṭang-kai tak pakhat head of recruitment Sven Mislintat chuan February ni 8-ah club a chhuahsan dawn, North London club tan hian kum khat leh thla hnih bak hna a thawk hman dawn lo tihna a ni.

Kum 46 mi Mislintat hian 2017 December thla khan Borussia Dortmund aṭangin Arsenal hi a zawm a, hun rei lote chhungin German mi hian player pariat an lakluh theih nan tha a thawh hlawk hle.

Gunners-in an player manto ber ni tura Gabon striker Pierre-Emerick Aubameyang an lakluh nana sulsutu leh, manager thar Unai Emery an lak theihna tura thluak hmangtu ni bawk Mislintat hi mi ṭangkai tak chu a ni.

Mahse, nikum September thla-a chief executive Ivan Gazidis-a'n AC Milan a pan hnuah a beisei leh duh angin thil a thleng ta lo. Mislintat chuan, "Arsenal ang club ropui tana hna ka thawk thei kha ka lawm, hun lo kal zel tura an hun tawn tur ka hre chak a, keipawh chona thar hmachhawn ka chak, tunah chuan danglamna siam hun a ni," tiin a sawi.