Juventus chak nuamsa

Italian champion Juventus tan Cristiano Ronaldo-a'n penalty a hlah chungin Douglas Costa, Emre Can leh Daniele Rugani te goal khat ṭheuh hmangin Serie A table mawngphah luahtu Chievo chu 3-0 in an sawp a, Turin club hian point 56 hmuin pahnihna Napoli aiin point kuain an sang fal leh ta.

Juventus-in AC Milan hneha Italian Super Cup an chawi avangin, Thawhṭanni zana league match an khelh hmain an mual Allianz Stadium-ah a lawmna hun hman a ni. Massimiliano Allegri naute hian a tir aṭanga a tawp thleng inkhel thunun zuiin harsa lo takin point thum an hlawh chhuak. Ronaldo-a'n second half-a penalty a hlah hian 2-0 in hma an hruai tawh, inkhelh banah manager Massimiliano Allegri chuan, "Ronaldo hian a career-a a penalty hlah hmasa ber a ni lo a, hnehna kan chang hi a pawimawh ber zawk chu a ni. Penalty a hlah hnuah Ronaldo pawh goal khung tumin a khel ṭha em em a ni," tiin a chhan.

Juve hian Pathianni zanah Lazio an hmachhawn leh dawn a, division hniam lama tla mai tura ngaih Chievo hian Fiorentina an mikhual ve thung ang.

Thawhṭanni zan inkhel dangah Juventus hneh lo hlim AC Milan chuan Fabio Borini leh Suso te goal hmangin Genoa chu 2-0 in an luhchhuah ve bawk. Milan hi palinaah an awm zel a, an chung chiaha awm Inter Milan an phak lohna chu point ruk niin season thara Champions League khelh an tumna an la chhawm nun zel.