Huddersfield manager thar Siewert

Premier League club Huddersfield chuan Jan Siewert chu an manager thar a nih thu an puang. Siewert hian manager chhuak ta David Wagner hmun ruak a luah dawn a, Terriers tan hian kum 2021 nipui thleng daih contract a ziak.

German manager Wagner-a'n 2015 aṭanga a enkawl Huddersfield hi Championship aṭangin EPL-ah a hruai kai a, mahse tun season chhungin beisei an phak lo - January 14 khan inhriatthiam tawnna in a hna hi a kalsan a ni.

Huddersfield hi Premier League-ah a mawngphah luahtu an ni mek a, point 11 chauh an la neih avangin a him china an awm phak lohna chu point 10 a ni; match khelh hmabak 15 chauh a awm tawh avangin manager thar Siewert tan pawh hna a hautak dawn hle. A hna hmasa ber atan January 29 hian Everton an hmachhawn ang.

Terriers chairman Dean Hoyle chuan, "Coach hmasa David Wagner kaihhruaina hnuaiah hlawhtlinna duhawm tak tak kan chang a, tuna kan manager thar tur pawh hian hlimna min thlen theih ngei kan beisei," tiin a sawi.