Semi final ni tawh mah se City-in naupang luhtir dawn

Manchester City chuan zanin dar 1:15 hian Pirelli Stadium-ah League One club Burton an lenchilh dawn a, Carabao Cup semifinal second leg ni mah se Pep Guardiola hote hi first leg-ah 9-0 a an chak tawh avangin chawlh hahdam hun tih pawhin a sawi theih ang.

First leg khelh zawhah manager Pep chuan final an thlen tawh thu a sawi a, chuvangin second leg-ah player naupang zawk an inlan a rinawm. Man City tan player tawnhriat nei tlem zawk te chher hriamna hun ṭha a ni.

Inelna a nih miau avangin khelmual chhungah a hahdam tak tak theih lo a, Pep hemi hrechiangtu Guardiola chuan star player ṭhenkhat chawlhtirin kum naupang zawk paruk aṭanga pasarih vel a dah dawn niin a sawi a awm.

City rawlthar zingah Ian Carlo Poveda, Felix Nmecha, Taylor Richards leh Iker Pozo te hming a ri a. Kum 18 mi League Cup-a vawi hnih inlan tawh Eric Garcia chu tel ngei tura ngaih a ni a, ani bakah hian kum 21 mi Philippe Sandler leh kum 19 mi Luke Bolton te pawh zin zingah an tel ang.

Man City hian an tum dan takah chuan hei aia tam kum naupang chhawr an tum a, amaherawhchu an Under 21 team-in Checkatrade Trophy quarterfinal-ah Sunderland an hmachhawn dawn avangin an tum dan an thlak danglam ṭul phah.

Poveda hian kum thum liam ta khan City a zawm a, hemi hma hian Barcelona-a inzir ṭhin a ni. Nmecha hi England leh Germany youth team tan a khel ve ve tawh a, Richards hi French midfielder niin attacking midfielder a ni a, kum 17 mi a nih lai aṭangin City Under 23 tana khel pha tawh a ni a, Pozo hi Spanish midfielder niin Andrea Pirlo te anga deep-lying midfield hna chelh thei a ni a. An pali hian kum 18 chauh an la nih avangin Pep Guardiola-a'n khelhna hun a pek a nih chuan League Cup semifinal thi tawha ngaih hi a hmuhnawm dan a dang thei ang.

Manchester City hian rawlthar pawh hmang lo se an squad a chhah sa hrim hrim a, tun season-ah goal 102 khung tling tawhin player 17 zetin goal an khung tawh. 

Burton nen first leg an khelh 

ṭum pawh khan player paruk zetin an pet goal a, Guardiola hnuaiah khelh dan nghet mumal tak an neih avangin tawnhriat nei tlem zawk player tan pawh intlak zep a harsat a rinawm loh. Spanish manager hian a hmaa inchhawp player-te hi a tute pawh thlang se Burton khel tawk tur an ni vek dawn.

League One club hian first leg-ah City goal zawnah vawi khat chiah an pet a, Pep Guardiola player thlan dan a zirin a mualpho nawn emaw City keeper tan hna tam zawk an siam thei ang. Thil chiang erawh Burton tan final kawng a inhawng tawh lo a, Man City-in naktuk zana inkhel tur Tottenham Hotspur leh Chelsea inkhela chak zawk nen nomawi an inchuh ang.