Glen Johnson a chawl ta

Liverpool defender hlui Glen Johnson chuan inkhelh a chawlhsan thu a puang a, "Player zawng zawngin an hun tawp hun an hre vek a, ka taksa la in 'fit' ṭhat lai ngeia chawlh hahdam hi ka duhdan a ni ṭhin," a ti. 

West Ham aṭanga bul ṭan defender hian kum 2003 khan Chelsea zawmin London club tan hian Premier League leh League Cup nomawi a chawi a, Portsmouth-ah 2006-07 kha loan-a khelin 2007-ah a nghetin a lut. 

Portsmouth tan hian FA Cup nomawi chawiin 2008-09 season-ah phei chuan PFA Team of the Year-ah a lang hial a, Chelsea-in laklet duh mah se pound maktaduai 18-a ngam tu Liverpool a pan. 

Reds tan hian League Cup a chawi tih loh chu nomawi sawi tur a nei lo. Kum 2015-ah khan Stoke City panin season hmasa thleng kha a khel a, a chawlh thu a puan hian club khelhna a nei tawh lo. 

England tana vawi 54 inlan thei defender chuan, "Naupang taka inkhelh chawlhsan hi ka duh fo ṭhin a, a bik takin kum 34 tlin tawh chuan an duhdana khelhchhuah a harsa tawh a ni. Season hmasa khan chawlh puang tur hian thutlukna ka siam daih tawh a ni," tiin a sawi.