Bellerin tan season a tawp

Arsenal defender Hector Bellerin chu a khup hliam vangin tun season chhung a inkhel thei tawh dawn lo. Spain international hi Chelsea nen an inkhelh ṭuma a hliam chu endik a ni a, a chawlh chen tur hi a chiang ta a ni.

Kum 23 mi Bellerin hi Blues 2-0 a an hneh ṭumin minute 72-naah khelmual aṭanga zawn chhuah a ngai hial a, a lan dan chuan thla ruk aṭanga thla kua a chawlh a ngai dawn. An player pawimawh a chawl rei tur hi Arsenal tan channa lian tak a tling ngei dawn.

Nikum December thla khan Southampton nen an inkhelh ṭumin a chawn a lo hliam tawh bawk a, a hliam dam hnuah chawlh kar nga hnua bul a ṭan lehna hmasa ber niin hliam dang a tuar leh nghal.

Unai Emery chuan Chelsea nen an inkhelh zawh hlim khan Bellerin hliam hi a na hle tih a sawi tawh. A rinrawl ber chan mah se Spanish manager hian tun thlasik bazar hun chhung chuan a ngheta player an lak theih loh tur thu a sawi tawh bawk a, a neihsa chher hriam an ngai dawn tihna a ni.

Spanish manager chuan "Ainsley Maitland-Niles kan nei a, ani hian ṭha takin a khel thei tih kan hmu tawh. Tawnhriat ngah Stephan Lichtsteiner a awm bakah mamawh huna chhawr theih Carl Jenkinson a awm bawk," tiin a sawi.

Arsenal hian Zirtawpni zan hian FA Cup fourth round khel turin Emirates Stadium-ah Manchester United an mikhual dawn a, nomawi chawi chunga season khar an duh a nih chuan an elpui team hneh a ngai dawn tihna a ni.