Lampard leh Cole thawk dun leh dawn

Chelsea legend Frank Lampard enkawlna hnuaia khel Derby County chuan England international hlui Ashley Cole chu season tawp thleng an hnena khel turin an lalut.

Lampard chuan, "Player ṭha tak, left back quality nei sang tak a ni a, a tawnhriat ngahte hi dressing room-ah kan chhawr ṭangkai dawn bawk a ni," tiin a sawi. 

Ashley Cole hian Arsenal aṭanga hriat hlawh ṭanin Premier League (2) leh FA Cup (3) nomawi a chawipui hnuin kum 2006 khan Chelsea a pan a, Blues-ah hian Premier League (1), FA Cup (4), League Cup (1), Champions League (1) leh Europa League (1) nomawi a chawi leh a ni. 

Chelsea aṭang hian AS Roma chu kum 2014 khan a pan a, 2016-ah USA lam hawiin LA Galaxy a zawm a, American club hi nikum October khan a chhuahsan. 

Lampard chuan, "Chelsea leh England tana kan khelhdun lai aṭang tawhin amah hi ka hrechiang em em a, he team tana a hnathawh theihte ka hria a ni," tiin a ṭhian hlui a fak hle.