Bagan-in Odisha sawp mah se Paul-a a langsar

Indian Super League inkhelah Inrinni zan khan ATK Mohun Bagan chuan 4-1 in Odisha FC an sawp a, Kolkata club tan Manvir Singh leh Roy Krishna-ten goal hnih ve ve an khung. 

Odisha tlawm mah se inkhelh zawhah Paul Ramfangzauva'n fak a hlawh a, Odisha goal awmchhun pawh a thawhchhuah a ni - penalty box pawn aṭanga a shot chuan post a per a, a per lehlam hi Bagan defender Pritam Kotal chuan a lo dang pial. Cole Alexander chuan hei hi lo chang fuhin goal khung nan a hmang. 

Bagan tan Manvir Singh chuan minute 11-na lekah goal hmahruai a khung a, South African midfielder Alexander chuan first half hun pek belhah Paul-a shot aṭanga ball kal hi si phurh sut nan a hmang. 

Beiseina sang tak nen second half-ah Odisha-in bul an ṭan a, mahse, beisei ang a ni lo - Punjabi striker pasang Manvir Singh bawk a inlar a, minute 55-naah Bagan goal hnihna a khung. 

Goal dang a luh loh reng hnuah Roy Krishna hun a thleng - Odisha tana goal khungtu Alexander-a'n a kuta ball a tawh fuh avangin penalty a chawi a, Krishna hian minute 83-naah goal-ah a chantir a, minute thum hnu lawkah an goal lina a khung zui. 

Odisha hian kar hmasa lawk khan Jamshedpur FC chu 1-0 in an ngam lo a, inkhelh zawha a ṭawngkam mawi lo tak avangin coach Stuart Baxter an ban zui - Bagan lakah hian coach lailawk Gerry Peyton-a enkawlna hnuaiah an khel. 

Peyton hian Jerry Mawihmingthanga leh Paul chu inkhel bul a ṭantir a, Baxter-a hnuaia hmun chang phak mang lo Paul-a chu India tan player ṭangkai tak a la nih tur thu a sawi. 

Fulham keeper hlui Peyton chuan, "Ka player Paul Ramfangzauva, season hmasa lawka I League khel ṭan ve chauh hi India tan player ṭangkai a la ni dawn. Ka tan chuan player ṭangkai tak a ni a, game thlir dan a thiam em em. 

"Inkhel thlak danglam tumin a mit a len a, hmun awl a zawng chat ṭhin. Attack nuam a ti a, first half-a a shot-te kha a ṭha takzet - khami vanga goal khung pawh kan ni reng a ni. He player hi India tan player danglam tak a la ni ang," tiin a fak hle. 

Zirtawpni zan ISL inkhelah Bengaluru leh Chennaiyin FC chu goal khung loin an inhnehtawk bawk a, Chennaiyin tan Lallianzuala Chhangte leh Jerry Lalrinzuala ten inkhel bul an ṭan - Lianzuala'n goal khungna remchang nei mah se a hun ṭha neih a chhawr lo thung. 

Bengaluru leh Chennaiyin tan semifinal khelh beiseina a la bo lo a, Odisha tan beisei a tlem tawh viau thung - Bagan erawh top four-a season khar tur anga sawi ngam an ni tawh.