ICC Awards - Kohli aia ropui an awm lo

Cricket khawvela thuneitu sang ber International Cricket Council Awards dawngtu nimin khan puan a ni a, Virat Kohli khing phak an awm lo. 

India captain hian Test Cricketer of the Year, ODI Cricketer of the Year leh Sir Garfield Sobers Trophy for Cricketer of the Year chawimawina zawng zawng a hui vek a, he chawimawina hui vek thei hmasa ber a ni!

Virat Kohli hi Test leh ODI Team of the Year-ah captain a ni ve ve bawk a, Indian wicketkeeper-batsman Rishabh Pant chu Emerging Player of the Year atan thlan a ni bawk. 

India captain Kohli-a'n kum 2018-ah hun duhawm tak a hmang a, Test-ah vawi 13 inlanin run 1,322 a siam a, 55.08 average a phak a, century vawi nga ngawt a siam. 

ODI-ah phei chuan Kohli hi el rual a ni lo. Kum 2018 chhung khan match 14 khelin run 1202 a vaw chhuak a, a average hi 133.55 niin century vawi ruk a vaw chhuak. Twenty20 international match 10 a khel a, run 211 a siam bawk. 

Kum 30 mi batsman hian Test leh ODI batsman ranking-ah number 1 nichungin kum 2018 a khar a, nikum khan test-a run 1,000 vaw tling thei pahnih zingah a tel a, ODI-a run 1,000 vaw kai pathum zingah a tel bawk.

ICC Awards-a mimal chawimawina liantham a hui kim vek a, Kohli chuan a hun tawn avanga a hlim thu a sawi. India captain chuan, "Thil ropui tak a ni a, kum 2018-a ka hnathawh hriat sak ka ni hi ka lawm a ni.

"ICC hnen aṭanga chawi-mawina dawn hi chu a hlu zual a, a bik takin khawvel puma he game khel ve te ngaihtuahin a hlu em em a ni. Ka tan chuan chawimawina ropui a ni a, thawkrim lehzual turin min fuih a ni," a ti. 

ICC chief executive David Richardson chuan, "Kohli hi ODI leh Test team-ah captain a nih bawkah chawimawina liantham pathum a hui vek a, ani hi he game chawisang tu ṭangkai tak a ni," tiin a sawi.

India captain Kohli tan a chawimawina dawn lawmna hun a awm hman dawn lo. Tukin zing dar 7:30-ah ODI match an khel lehnghal dawn a, New Zealand an mikhual ang. 

India hi Australia-a ODI leh Test series-a chak hlim an ni a, an phur vanglai tak a ni. New Zealand nen hian ODI series match nga an khel ang a, ODI bik hi February 3-ah match hnuhnung ber an khel dawn. 

February 10-ah Twenty20 international an khel leh ang a, T20 erawh match hnih chiah khelh tur niin February 13-ah an zo ang. Ram pahnih hi test-ah an inhmachhawn dawn lo.