Villa mualah Arsenal an tlawm

Arsenal ze ngai a chhuak, beiseina an neih san vanglai takin an tlusawp leh ta. Mikel Arteta naute hi Aston Villa lakah 1-0 in an tlawm, goal awmchhun hi inkhel tir lama Ollie Watkins khung a ni.

November thla khan Emirates Stadium-ah Villa hian 3-0 in hnehna an lo chang tawh bawk. Villa Park-ah Dean Smith naute an chak leh tak avangin kum 28 hnua a vawi khat nan season khat chhungin Villa-in Premier League-ah Gunners vawi hnih an hneh.

Inrinni zan inkhelah goal kan hmu hma. Hrem vanga inlan thei lo keeper Bernd Leno hmunruak luahtu Mat Ryan-a'n club tana a match hmasa berah second 74 bak goal a venghim hman lo a ni!

Defender Cedric Soares-a back pass sual latu Bertrand Traore-a'n Watkins tan a siamsak a, English forward hian na leh ṭha takin lo pet fuh lo mah se Rob Holding-a'n a lo dan pial avangin keeper Ryan tan dan hman a ni tawh lo.

Wolves an hneh loh ṭumin Leno hnawhchhuah a ni a, German international hmunruak luah tur hi Zirtawpni chhun thleng khan Arteta-a'n a la ti chiang lo. Training nei mumal lo Ryan a luhtir a, goal chhuah mah se Jack Grealish leh John McGinn te khung tur chu ṭha takin a dansak.

Pierre-Emerick Aubameyang an thlun ngheh theih vangin Arsenal ṭantute an lawm a, season tir lamah che ṭha lo mah se kumin tir lamah an insiamṭha. Gabon international hian tun hnaiah chhungkaw buaina vangin match ṭhenkhat a khel lo a, a tel loin result an nei ṭha tawk lo.

Auba-a'n Gunners tana inkhel bul a ṭan loh hnuah FA Cup aṭangin an tla a, tun hnai an match hnuhnung pathumah chak ni hmel an hmu lo. Wolves leh Villa an hmachhawn ṭum hian bench aṭangin a lut. Danglamna erawh a siam thei rih bik lo a ni.

Aubameyang tlanna hmuna dah Nicolas Pepe-a'n Wolves lakah goal khung mah se a vennei nawn lo. Ivory Coast international hian a hun ṭha neih pahnih chu goal ban hrulah a liamtir a, defender Hector Bellerin leh substitute Martin Odegaard te pawn an khung thei bik lo.

Arsenal manager Arteta chuan, "Kan tihsual vangin goal kan chhuah a, holam takin goal dang khung belh theihna vawi thum vek kan siamsak bawk. Chutih rualin inkhel pumpui kan thlir chuan kan vanduai ve bawk a ni.

"Goal khung theihna remchang insiam turin ball kan inpe fuh tawk thei lo, hun ṭha kan neih pawhin a nihna tur hmunah tak kan pet lut thei lo," a ti. An match hnuhnung pangaah vawi thum ngawt goal an khung loh avangin tlarhma lam chher hriam an ngai hle.

German keeper Leno a awm avangin inkhelh tam duh Martinez tan Emirates Stadium chhuahsan a ngai. Argentine keeper hian season hmasa lama team talbuai Villa a zawm, tunah erawh an talbuai tawh lo, season thara European football khelh an sawi ri ngam.

Villa keeper hian Granit Xhaka-a freekick ṭha zet chu a dansak, keeper ṭhenkhat tih theih loh tur a tih theih avangin point an hmuh theih nan a pawimawh. Villa tan hian Premier League match 21 a khelh aṭangin vawi 11 clean sheet a nei, heng zinga pahnih hi a club hlui lakah a ni hial.

Aston Villa manager Smith chuan, "1992-93 hnuah a vawi khat nan season khat chhungin Premier League-ah Arsenal kan hneh nawn, ka naute hi mellung pawimawh phun duhin an tuihal," a ti. Tun hnai ni 18 chhunga match ruk an khelhna ni mah se player-ten tha tho takin an khel thei.

League match 21 an khelh aṭangin point 35 an hmu tawh, anmahni aia match hniha khel hnem zawk Arsenal aiin point liin an sang zawk. Smith-a naute hi table-ah pariatna an ni a, palina Liverpool nen an inkarah point nga chauh a awm.

English manager Smith chuan, "Player zawng zawng thawhrim vangin point thum hlu tak kan hlawh chhuak. Kan hun ṭha neih kan chhawr ṭangkai nghal a, kan khingpui lamin na takin min nawr mah se nidang ang bawkin keimahni kan inveng thei," a ti.