US-ah Joshua a inlan a ngai - Bob Arum

Boxing legendary promoter Bob Arum chuan British boxer sawi hlawh Anthony Joshua chu boxer ropui zingah tel a duh tak tak a nih chuan US-ah inhnek a hmachhawn a ṭul thu a sawi. 

Muhammad Ali lo kaihruai tawh ṭhin Arum chuan, "UK-a boxer hriat hlawh lem lo hmachhawn fo hian a nihna tak tak a thai chhia a ni. USA-ah khuan mipui hnenah heavyweight number one zawt ula, Tyson Fury tiin an chhang ang," a ti. 

Kum 87 Arum chuan Fury hi USA ngeia Deontay Wilder a hmachhawn vanga hriat hlawh a nih thu a sawi a, sum tam hailut tur pawhin US chu hmun fuh ber a nih thu a sawi. 

Joshua hian April 13 atan Wembley chu a 'book' lawk tawh a, mahse tun hnaiah Fury leh Wilder te inhnek tur inbiak dan a zirin US-ah a insawn mai theih thu sawi a awm.