Ronaldo hoin Juve an chak

Cristiano Ronaldo hming leh 'goal' sawi zawm zel a ngai. Portuguese forward hian AS Roma lakah goal khungin a club Juventus chu 2-0 in hnehna a chanpui - Serie A nomawi an kawl lai humhim ngei an tum.

Inkhel dangah Inter Milan chuan Fiorentina 2-0 bawka luhchhuahin point 47 an hmuh, table chung berah an awm lailawk. Nizan khan AC Milan an inlan a, inkhel result a zirin hmahruaitu hi an la inthlak thei.

Zirtawpni khan Ronaldo-a'n kum 36 a tling, a kum rualpui dangte chuan football an chawlhsan tawh. Ronaldo erawh a la ṭha reng, Roma nen an inkhelh ṭum hian Alvaro Morata ball pek chu a ke ding lam rap dingin laklawh nei miah loin a ke vei lamin a chhuih lut.

Tun hnai an match hnuhnung pathumah Ronaldo hian goal a khung lo a, tunah erawh a thiam a la theihnghilh lo tih a lantir. Goal a khung bakah hian bar a tih per a, a goal shot ṭha tak chu Roma keeper Rau Lopez-a'n a lo dang hram.

Season kal lai inelna hrang hrangah Ronaldo-a'n goal 23 a khung leh ta. Serie A bikah match 17 aṭangin goal 16 a khung, ani aia khung hnem an awm lo; Inter striker Romelu Lukaku aiin goal hnihin a khung hnem zawk.

Midfielder Nicolo Barella leh Ivan Perisic te goal khat ve ve hmangin Inter Milan chuan khualmualah Fiorentina an hneh a, striker Lukaku goal khung chu offside vanga pawm ni lo mah se point thum an hlawh chhuak tho.

Antonio Conte naute hian inelna hrang hranga Fiorentina an hmachhawn hnuhnung 10-ah chak loh an nei ta lo. Season hmasa pahnihna team hian Serie A hma an hruai lailawk a, an elpui AC Milan leh Old Lady te nen na takin nomawi an inchuh dawn.

Inkhel dangah Napoli chu Genoa mualah 2-1 in an tlawm. Gennaro Gattuso naute tun hnaiah an talbuai a, Italian manager hian club thuneitu lam a mil loh bawk avangin a hmalam hun a chiang lo chhunzawm, an ban a nih pawhin a mak lo ang.