A vawi 50 nan Federer Vs Djokovic

Vawiin tlai dar 2:00 hian Australian Open mipa semifinal-ah Roger Federer leh Novak Djokovic te an inkhel dawn a, tennis player ropui pahnih hi vawi 50 an inhmachhawnna tur chiah a ni.

Federer hi tennis player piang tawha ropui ber ang hiala sawi ni mah se Djokovic lakah record a nei chhe zawk. Serbian star hi vawi 49 an inhmachhawn tawhah vawi 26 a chak a, Swiss star hian vawi 23 hnehna a chang. Grand Slam bikah pawh Djokovic hian 10-6 in hma a hruai bawk.

Kum 32 mi Novak Djokovic hi seeded number 2 a ni a, tun inelnaah match hmasa bera Jan-Lennard Struff laka set khat a hloh hnuah set a hloh leh tawh lo.

Serbian star hi Australian Open-ah hian champion lai a ni bawk a, kum 38 mi Roger Federer lakah hnehna chang ngei turah a ngaih theih. Djokovic hian thahrui a la ngah a, tun inelna hmaa neih team inelna ATP Cup-ah pawh Serbia a la chakpui. Federer erawhin Australian Open atana a tha khekin a inlan lo thung.

Roger Federer hian semifinal lut turin Tennys Sandgren lakah set linaah match point vawi sarih a paltlang. Swiss star hian ṭhal na avangin harsatna a tawk a, chutichung chuan hnehna a chang tho.

Federer chuan, "Sandgren khan tihsual a nei lam ni loin ka vannei ve a ni," tiin chak tura a vanneih tel thu a sawi. Chutihrualin nikum khan Wimbledon final-ah Djokovic lakah Federer hian ama service ngeiah championship point vawi hnih a hum thei lo a, nomawi a chan phah.

Tun ṭumah hian Federer hian Djokovic hnehlet theihna hun ṭha a nei a, amaherawhchu a hliam hi a dam hman kher ang em tih pawh a chiang lo. Chutihrualin kum 38 mi Federer hian thilmak tam tak a lo thlentir tawh a, Djokovic lakah pawh result sawi lawk theih a ni lo.

Djokovic chuan, "Roger hi chu Roger a ni a, khawi hmunah pawh ṭha takin a khel thei vek. Inelna lian tham Grand Slam semifinal chinah chuan a danglamna a lantir leh ṭhin a, hei vang hi a ni ang tun thlengin player ṭha ber zinga mi a la nih theih," tiin amah aia kum ruka upa a fak.