Thiem-a'n Nadal a dal

Kumin Australian Open-a champion rinkai ber Rafael Nadal chu nizan khan Dominic Thiem-a'n a barakhaih a, final-a Nadal vs Roger Federer/Novak Djokovic beisei an awm a nih chuan an duhthusam a thleng dawn lo.

Rod Laver Arena-ah Thiem leh Nadal ten inkhel hmuhnawm bik an lantir a, Austrian star hian semifinal lut turin 7-6(7-3), 7-6 (7-4), 4-6, 7-6 (8-6) in seeded number 1 a hneh. Seeded number 5 Dominic Thiem hian January 31, Zirtawpni tlai dar 2:00-ah seeded number 7 Alexander Zverev nen semifinal-ah an inhmachhawn ang.

Kum 33 mi Nadal hian Grand Slam 19 a la tawh a, Thiem a hmachhawn hma hian Nick Kyrgios lakah set khat a hloh a, a bak zawngah awlsam takin a chak vek. Nizan inkhelah pawh hian Nadal hi a khel chhe lo a, Dominic Thiem a khelh ṭhat avangin a vanduai zawkah a ṭang a tih theih.

Kum 26 mi Thiem hian chak turin darkar li leh minute 10 a mamawh a, set thum a laknaah pawh tie break a thleng vek. Set linaah Nadal a rawn 'comeback' a, a tluan tling ta lo. Spanish star hian 5-4 a nih laiin Thiem a rawn break sak a, 5-5 a nih chiah. Tie break-ah an pahnihin an hlauthawng a, tih ṭhat leh tihsual (unforced error) a inchawhpawlh a, Thiem-a'n match point vawi hnih a neih hnuah Nadal-a'n a nih rualpui.

Amaherawhchu hun pawimawhah Nadal a chesual a, service nei ṭha zawk leh tihsual nei tlem zawk Thiem a ding chang. Grand Slam-a la champion lo Thiem chuan, "Rilru huaisen a ṭul a, boruak rip tak ka paltlang thei lo. Eng emawin min mawlh a, ka vuak leh chiam ṭhin avangin ka hun ṭha neih ka bawhpelh. Amaherawhchu tie break-ah ka vannei a, ka lawm takzet a ni," tiin inkhel chungchang a sawi.