Fury hian tihsual a nei - Wilder

WBC world heavyweight champion Deontay Wilder chuan February 22-a rematch a neihpui tur Tyson Fury chuan tihsual a neih thu a sawi a, British boxer hian a trainer a thlak chu a inchhir hle tur thu a sawi. 

Kum 31 mi Fury hian Wilder-a knockout ngei tur thu a sawi a, American boxer nen an inhnek tur atana a inpuahchahna chi khat atan December khan a trainer ni sa  Ben Davison chu banin Javan 'SugarHill' Steward a thawhpui. 

Wilder chuan, "Fury hi a vaupung chu a na viau a, a tak ramah chutiang chu kan la hmu lo thung. Keimah ang lo takin a kal tluang ve lo a, a kuttum hi lukham dup ang mai a ni," a ti a, British boxer a ngainep hle. 

Vawi 43 inhnek a hmachhawna la tlawm miah lo Wilder chuan, "Keimah ang boxer hmachhawn chuan a harsa ṭhin a, training camp siksawi vel phei chu thil pawi tak a ni thei. 

"Hnathawh dan hriaa inngai leh ngaihdan i ngah lutuk chuan a tawpa tuartu chu nangmah bawk i ni," tiin a sawi a, trainer thlak kual Fury chuan a tuar tur thu a sawi. 

Tunlai khawvela heavyweight boxing ti ngaihnawm ber pawl Tyson Fury leh Deontay Wilder te hi December 2018 khan an lo intawng tawh a, chak zawk awm loa puan an ni. 

Boxer pahnih hi an result-ah an lungawi lo ve ve a, February 22-ah an inhnek leh dawn. Boxer pahnih inhmachhawnna tur hmun hi MGM Grand Garden Arena, Las Vegas-ah a ni a, mi 17,000 an leng.