Hmeichhe infiammi hausa zingah Sindhu

America rama business magazine lian Forbes chuan nikum June leh kumin June thla inkara hmeichhe infiammi sum lalut hnem a tar chhuak leh ta a, a sang zual 15 zingah PV Sindhu chu lang phakin Indian shuttler hian 13-na dinhmun a luah.

Season kal laiah India nula badminton khel thiam Sindhu hian nomawi lian tham chawi a la nei lo a, a inkhelhna aṭanga a lakluh chu $500,000 chauh a ni. Mahse, sumdawnna leh thil dang aṭanga a lakluh hi US dollar maktaduai nga zet a tling. 

Infiamna pawn lam, thil dang aṭanga an sum lakluh bikah chuan Sindhu chungah - Alex Morgan, Maria Sharapova, Sloane Stephens, Angelique Kerber, Naomi Osaka leh Serena Williams te chiah an awm. Forbes-in a tarlan a sang zual 15 zingah hian 10 zet chu tennis player an ni. Tennis player intlar hnungah FIFA Women's World Cup-a US champion puitu Alex Morgan a awm, tennis player ni loah chuan Sindhu (badminton) leh Ariya Jutanugarn (golf) te nen chiah an lang phak.

Serena Williams chu a zawna a vawi li nan a chung berah a awm a, American star hian a inkhelhna aṭangin dollar maktaduai 4.2 a lalut a, lawmman bikah chuan Naomi Osaka ($8.3 mtd) a tluk lo.

Mahse, sumdawnna leh thil dang aṭangin Serena hian dollar maktaduai 25 zet a lalut; a pumpuiah $29.2 mtd a lalut tling. Grand Slam vawi 23 champion tawh hnung chiahah hian amah ang bawka tennis khel thiam Osaka ($24.3mtd) a awm.

Kum 37 mi Serena hi an ram mai ni loin khawvel huapa mi hriat hlawh a ni a, thuamhnaw leh hmeichhe incheina chi hrang hrang zuartu lam nen inremna an neih hnem avangin a sum lakluh hi a sang - tuna an inremna neih sa ang chuan nakkumah pawh a chung berah a awm a rinawm a ni.

Rio Olympic 2016-ah khan PV Sindhu-i'n badminton singles huangah final a lut a, gold medal inchuhna inkhelah Carolina Marin ngam lo mah se silver medal a dawn avangin India mipui thinlungah a tla na, mipui tamna India ramah sumdawng hausa hoin an thil siam fak lar turin an duh.

Bridgestone, JBL, Gatorade leh Panasonic te chu inremna a neihpui zinga langsar zual an ni, nomawi a chawi hnuhnung ber chu season hmasa kharna BWF World Tour Finals daih tawh kha a ni a, heti chung hian sumdawnna lamah a la tlak nat em avangin dinhmun ṭhaah a la ding.

Tun hnaia inelna hnuhnung Thailand Open aṭangin Sindhu hi a inhnukdawk. August 19, Thawhṭanni aṭanga khelh ṭan tur BWF World Championships atan inbuatsaihna a nei mek a, a sum leh a ranking dinhmun sawhnghet zual tur chuan inelna lianah hian chet fuh a pawimawh dawn a ni.