Premier League a hnai - tu nge champion dawn?

Zirtawpni zan dar 12:30-ah Liverpool-in Norwich City an mikhual dawn a, tun season-a Premier League match hmasa ber tur a ni. 

Premier League en turin zan khat 'mut' bak keini lam tan a ngai ta lo a, transfer bazar a 'hot' tawlh tawlh bawk avangin English top flight football inkhel tur hi a nghahhlelhawmna a zual tawlh tawlh. 

Season hmasa ang thoin Manchester City leh Liverpool chu inum leh ber tura ngaih an ni a, Community Shield-ah team pahnih hian inkhel hmuhnawm tak an pholan bawk avangin English football ngainatute phurna an belhchhah. 

Hetihrual hian Arsenal-in ṭum dang ang lo takin sum sen an huai thar a, Frank Lampard hnuaiah Chelsea an phur a, Manchester United-in mutthluk reng an tum lo tih an sum hmangin an lantir a, Tottenham Hotspur lah ngaihthah rual an ni lo bawk. 

Pep Guardiola enkawl team an nih chuan eng team mah hi an chhe thei tak tak lo. Season hmasaah City-in Liverpool nen nomawi inchuh boruak hmuhnawm tak min tem tir a, tun season-ah an nomawi humhim an tum leh dawn. 

Midfield an neih ṭhat sa thuam chak belh turin Atletico Madrid aṭangin pound maktaduai 62.8 man Rodri an lalut a, player langsar dang lakluh nei lo mah se an neih sa ringawt pawh hi a chhah ṭha tawk. 

Vincent Kompany 'leadership' leh thiamna chu City tan awm tawh lo mah se talbuai phahna tur a awm lo ang. Season hmasaa hliam vanga chawl deuh reng Kevin De Bruyne a dam ṭha leh tawh a, Bernardo Silva leh Raheem Sterling te an la thiam reng bawk. 

BBC chief football writer Phil McNulty chuan City hi champion leh turin a beisei a, Liverpool chu pahnihnaah bawk a dah!

Jurgen Klopp-a'n nipui transfer-ah sum tam tak hman tur an neih loh thu a sawi a, season hmasa Liverpool team aṭang khan thil danglam tak kan hmu dawn lo niin a lang. 

Hetihrual hian Virgil van Dijk leh Mohamed Salah kawltu club an la nih miau avangin Reds hi dah hniam theih an ni lo a, Jurgen Klopp-a'n a kaihhruai bawk avangin attacking football hmuhnawm a beisei theih ang. Reds hian pound maktaduai 1.3 man Sepp van den Berg, Fulham rawlthar Harvey Elliott leh Adrian (free) te chu an lakluh awmchhun an la ni rih a, first eleven chang lo tur an ni!

City aia an squad a chhah loh zawk miau avangin Reds hi football journalist tam zawkin pahnihna tho ni leh tura an ngaih an ni a, mahse European champion an nih tawh miau avangin season hmasa aiin inrintawkna an ngah ang tih hriat tel a ṭha. 

Nipui transfer-ah hrem an nih avangin Chelsea-in player thar an lalut thei lo a, mahse coach thar Frank Lampard an neih avangin an phur - an club legend hian eng chen tak thlenpui ang maw, tih chu zawhna a ni mek. 

London club hian an thiampuipa Eden Hazard chu Real Madrid lakah an chan a, January-a Borussia Dortmund aṭanga an lakluh tawh Christian Pulisic hian a hmun ruak a luah zo lo a nih chuan Blues tan khua a var lo ang. 

Season hmasa khan he team hian Premier League-ah pathumna dinhmun an luah a, Europa League-ah an champion bawk. Mahse, an bazar theih miau loh avangin champion tura rin an harsa a, tuna Chelsea squad-a club tana goal khung hnem ber chu match 292-a goal 52 khungtu Willian a ni!

Lampard hian season hmasa khan Derby County a enkawl tih zawng chu tawnhriat a neih a ni a, khelmuala fan-te hlimna thlen ṭhintu hian technical area aṭangin thlen leh thei tak maw?

Tottenham Hotspur manager Mauricio Pochettino-a'n club-a player transfer chungchangah thu a neih loh thu a sawi a, a hna chu 'manager' tih aṭanga 'coach'-a thlak a duh thu thlengin a sawi!

Spurs fans tam takin an coach an thlawpna thu social media lamah an pholang zui a, Argentine manager hi a lungawi lo reng a nih chuan London club tan beisei tih san a harsa ang. Hetihrual hian season hmasa Champions League final an luh avangin Spurs player-te tun hma zawng aiin an inringtawk a, club record-a midfielder Tanguy Ndombele (£53.8m) an lakluh chu beiseina siamtu tur zingah a tel. 

Club record transfer, stadium thar leh CL final-te chu Spurs-in tun season-a an ken 'tel' tur a ni a, champion an sawi ri ngam ang - mahse season hmasa khan he team hi league match 13-ah an tlawm tih hriat tel a ṭha. 

Unai Emery-a'n Arsenal-ah sulhnu ropui hnutchhiah loh a duh lo a, season hmasaa an thlen chin aia sang thlen a tum - club record-in Nicolas Pepe (£72m) a lalut tawh. 

Tlarhmaa a player neih sa Pierre-Emerick Aubameyang leh Alexandre Lacazette thlir tel phei chuan Gunners hian goal khungah chuan harsatna an nei dawn lo tih a chiang. Midfielder Aaron Ramsey chan mah se Mesut Ozil an la nei cheu bawk. 

Mahse, he team hian tlarhnung lam an la buaipui tawk lo tiin a sawi theih a, 2017-18 season-a goal khung thei, mahse chhuah hrat bawk Liverpool ang lek kha an ni lo ang tih a sawi theih loh. Gunners ṭantuten season tharah chuan nomawi an beisei tawh dawn tih a chiang a, mahse tun dinhmuna an tlarhnung hi chu Premier League champion pui turin a la ṭha tawk lo.

Manchester United-in an ropuina ang kha neih let leh an tum tih lanna chu pound maktaduai 80-a Harry Maguire an lei ngam hi a ni a, Aaron Wan-Bissaka (£50m ) an leina pawh a tlawm lo. 

United boss Ole Gunnar Solskjaer-a'n an chak lohna a hriatchian avangin tlarhnung thuam ṭhat a ngai pawimawh a, chutihrual chuan Paul Pogba leh Romelu Lukaku ten chhuak tura thawm an neih reng avangin team talbuaina thlentu an ni thei. 

Red Devils hian tlarhma lam chinfelna tur pawh an zawng mek tih phat rual a ni lo. Mahse, Paulo Dybala lakluh an tumna chu a tlawlh a, United hmalak leh dan tur hi hriat a ni lo. 

Lampard ang thoin Ole-a'n level sangah coaching tawnhriat a la nei ṭha tawk lo a, Pep leh Klopp awmna league-a anni meuh lehpel tura han dah chu harsa tak a ni rih.