Diego Forlan-a'n inkhelh a chawlhsan

Atletico Madrid leh Manchester United striker hlui Diego Forlan chuan Thawhlehni zan khan football a chawlhsan thu a puang a, a infiamna ngainat leh hmangaih ber hi a khel zui tawh dawn lo.

Kum 40 mi Forlan hi kumin May thla khan Hong Kong-ah Kitchee tan a inlan - a tan match hnuhnung ber a ni. A chawlh thu sawiin Forlan chuan, "Hetiang thu ka sawi hun hi engtikah emaw chuan a lo la thleng dawn tih ka hria. Ka hun tawnah chuan theng lo tura ka duh ber ni mah se a rawn thlen ngei a ngai si. Tun aṭang chuan professional football ka khel tawh lo ang," tiin a sawi.

A vanglaia striker hmunnawm berte zinga mi chuan sawi zawmin, "Kum 21 chhung zet ka chamchilh tawh chu ka mangṭha a ngai ta, ka hun tawnte kha ka tan chuan theihnghilh loa hriatreng tur an ni hlawm. Hun hlimawm leh nuam bik ka tawn ang kha engtikah mah ka tawng leh thei dawn tawh lo," a ti.

South American ram Uruguay-a piang leh seilian a ni a, a football hun bul chu Agrentine club Independiente-ah a hmang ṭan. Kum 2002 January thla khan pound maktaduai 6.9-in Manchester United a zawm.

Premier League club tan beisei a phak lo, inelna hrang hrangah match 98 a khelh aṭangin goal 17 chauh a khungsak. Mahse, 2002-03 season khan a club hi league leh FA Cup nomawi a chawipui a, English club-ah hian hlawhchham tia sawi tur chu a ni lo.

Manchester United aṭangin Villarreal a pan a, a hnuah La Liga club tho Atletico Madrid a zawm bawk. Spanish club pahnih tan hian league match 240 a khelh aṭangin goal 128 zet a khung a, football ngainatute zingah tu nge Forlan? tih inzawh nawn a ngai tawh lo; 2010 khan Atletico chu Europa League nomawi a chawipui a ni.

La Liga lama a vanglai hun a hman hnuah Inter Milan, Cerezo Osaka, Penarol, Mumbai City leh Kitchee tan a khel a, heng club-ah hi chuan sulhnu ropui tak a hnutchhiah tam lo. Indian Super League club Mumbai FC tan hian match 11 aṭangin goal nga a khungsak.

Player ṭhenkhat chu club lama an hlawhtlin viau laiin ram tan an thawhhlawk tawk ṭhin lo a, sawisel pawh an hlawh phah ṭhin. Forlan erawh Uruguay tan a hnathawh leh sulhnute chu hriatreng a ni tawh ang.

Ram tan match 112 a khelhah goal 36 a khung a, 2011 khan an khawmualpui inelna sang Copa America nomawi a chawipui. 2010 World Cup-ah khan palina an ni a, hemi ṭum hian goal nga khungin Golden Ball a dawng - Team of the Tournament zingah a tel bawk.

Barcelona striker Luis Suarez, tun hma lama Forlan nena ram tana lo khel dun tawh chuan thlahna thu sawiin, "Uruguayan football tan chuan history a ni. Hun hlimawm min tawntir tawh zozai kha theihnghilh a ni lo ang. 

Khelmual chhung leh a pawnah chanchin ṭha i ngah a, ka player ngaihsan zinga mi i ni. I hming chu Uruguay legend tiin kan hrereng ang. Nun bul i ṭan thar leh dawn a ni a, chona thar i hmachhawn turah hlawhtlinna chang turin duhsakna ka hlan a che," tiin 

a thlah.