Chanmari leh Police tan beiseina tlêm

NEXA Independence Day Celebration Football Tournament-ah nimin khan Chanmari FC leh Mizoram Police 2-2 in an inhnehtawk a, group A inkhel dangah Aizawl FC leh Electric Veng FC te 0-0 a an inhnehtawk bawk avangin team paliten semifinal luh beiseina an la nei vek.

Electric Veng coach Lalsangzuala Hmar chuan I League club Aizawl FC an hmachhawn hmain point khat an hlawh chhuak thei a nih chuan an lawm tur thu a sawi a, minute 90 chhung Standly Rozario hote chelhin point khat hlu tak an hlawh chhuak. Amaherawhchu Sanga hote hian Mizoram Police an la hmachhawn dawn avangin semifinal kawng a la awlsam dawn lo.

I League club-in goal chance nei ṭha zawkin F. Lalremsanga'n first half-ah a hlah a, second half-ah bench aṭanga lut Saitual tlangval PC Lalhriatpuia'n keeper chiah a hmachhawn hnuah a khung lo bawk. Nimin inkhel hi ruahsur vangin darkar khat dawn chawlh a ni a, team pahnih theihna tak a lan loh phah niin a lang.

Standly Rozario hote hian group match hnuhnung berah Chanmari an hmachhawn dawn a, S. Malsawmtluanga hoten beisei an la neih avangin semifinal kawng hi Electric Veng ang thoin a harsa ang.

CFC tan Zama 

MFA Super Cup final rematch-ah Mizoram Police-in penalty ṭum hnih an hmu a, Chanmari defender Lalrinchhana Tochhawng-in ball a tauh ṭhelh a, insa seng hman lo Hmingthanmawia kut perin Police penalty hmuh hi Lalramtharmawia'n minute 39-naah goal-ah a chantir. 

Chanmari FC coach Mama hlauhthawnsa angin goal khung kawngah bawk harsatna an tawk. Minute 71-naah Police-in penalty hmu nawnin Lalbiakthanga'n goal-ah a khung a, 2-0 a ni tak avangin Chanmari dinhmun a chhe hle. Chhum zing vangin inkhel a mumal thei lo a, Chanmariin minute 77-naah Lalnunzama hmangin siphurh an sut ṭhen a, beiseina thar neiin chhum zin vanga chawl zuiin infuih nan an hmang.

Chhum bo hnuah Zama thiamna a bo ve lo a, Electric Veng FC laka vanduai Laipuitlang tlangval hian minute 88-naah siphurh a sut. Goal dang lut tawh loin Lalnunzama goal hnih zarah Mama hoten semifinal luh beiseina an la nei zel.

Vawiin tlai tlai dar 2:15 hian MPL kaithar Venghnuai chuan champion lai Chhinga Veng nen an inkhel dawn a, Chawnpui hneh tawhtu Rindika Ralte hoten fiahna tak tak an hmachhawn dawn.

Chhingcows hian an match hmasa berah point khat chauh an hlawh chhuak a, Venghnuai laka an chak thei lo a nih chuan hmabak a harsa dawn. Inkhel result nghawng a len avangin vawiin tlaia group B inkhel hi a hmuhnawm ang.