Derby County tana khel tur Rooney

Manchester United legend Wayne Rooney chuan English football-a kir turin thutlukna a siam fel ta a, Major League Soccer club DC United tana khel mek striker hian January-ah Derby County a zawm dawn. 

Championship club leh Rooney inremna ang chuan England captain hlui hian player a nih bakah coaching staff a zawm tel dawn a, a hna pawimawh ber tur erawh player a nihna chu a ni ang. Kum 33 mi striker hian thla 18 chhung atan Derby-ah hian contract a ziak a, a ṭul dan a zirin kum khat dang pawhsei leh theih tura tih a ni. Rooney hian kar khatah £100,000 a hlawh dawn a, Championship player-te hlawh chawhrual hi kar khatah £20,000 vel a ni!

July 2018-a Everton aṭanga DC United pantu striker hian MLS club-ah hian kum khatah pound maktaduai 2.22 vel a hlawh a, Derby-ah hian thla 18 chhungin pound maktaduai riat vel a hlawh dawn thung. Derby-in sum heti zata Rooney an lakluh theih chhan hi club record-a online casino company 32Red nen thawhhona an ziah vang a ni a, Rooney hian jersey number '32' kher a ha dawn a ni. 

Rooney chuan, "Tih theih tam tak ka neih ve ka beisei a ni. Thutlukna siam harsa tak ni mah se kan rilruah kan chhungte an awm reng a, anni hnaiha kan awm leh theih nan thutlukna kan siam. "Derby County-in ka hmaa hna an chhawp hian minti phur em em a, manager Philip Cocu nena thawhdun ka chak tawh takzet a ni," tiin a sawi. 

Rooney hian Manchester United tan match 559-ah goal 253 khungin club tana goal khung hnem ber a ni a, nomawi chawi theih ang zawng zawng a chawi kim bawk. United chhuahsanin 2017-18 season kha Everton tan a khel a, match 40-ah goal 11 a khungsak. DC a pan hnuah league match 41 a khel a, goal 23 a khung thung.