Australia beiseina siamtu Barty

Ashleigh Barty-i'n kum 42 hnua Australian Open-a tualchhung mi champion hmasa ber ni turin match hnih chiah a mamawh tawh. Tukin zing dar 8:30 hian Rod Laver Arena-ah Sofia Kenin a hmachhawn dawn.

Australia mipui beiseina Barty hi Grand Slam-ah French Open chiah la champion mah se tun ṭum inelnaah hian seeded number 1 a ni a, world number 1 a nih bawk avangin an beiseina hian a tak ram a thlen theih a beiseiawm hle.

Barty hian Kenin lakah 4-1 in hma a hruai mek a, nikum 2019 chhung ringawt khan vawi li an inhmachhawn. Kenin hian nikum August thla khan Toronto-ah hnehna a chang a, a bak zawng chu Barty-i'n hnehna a chang.

Chutihrualin Russia-a piang American Kenin hian tun dinhmun thleng tur hian Serena Williams a hneh. Kum 21 mi lek a nih avangin final a thleng thei a nih chuan kum 2008-a Ana Ivanovic-i'n final a thlen hnua Australian Open final thleng thei naupang ber a ni ang.

En châkawm lai chu Barty hian service a nei ṭha a, tun inelnaah pawh aces ngah ber dawttu niin match ngaah vawi 29 aces a nei tawh. Seeded number 14 Kenin hian Barty chhanglet turin theihna a nei a, court chhunga a chevel a ṭhain hmunruak a hmuh chak avangin semifinal hmuhnawm tak a beiseiawm hle.