League Cup final khel tur Villa

Aston Villa chuan Thawhlehni zan khan League Cup semifinal-ah 2-1 in Leicester City an hneh a, Premier League-a an kir kumah major tournament final an lut nghal. 

Leciester khelmual King Power Stadium-ah team pahnih hi 1-1 in an lo inhnehtawk tawh a, second leg-ah Villa-in hnehna an chan avangin inkhel pahnih belhkhawma an chakna chu 3-2 a ni. 

Villa hian minute 12-na leka Matt Targett goal hmangin hma an hruai a, Leicester-in  Kelechi Iheanacho hmangin an chhanglet. 

Premier League club pahnih inkhelah hian extra time khelh ngai tur angin lang hman mah se Trezeguet chuan hun pek belh minute thumnaah chakna goal a rawn khung a, Foxes a ṭah tir. 

Premier League lama an khelh dan aṭanga thlir chuan Leicester City chu tlang tur zawka ngaih an ni a, squad pawh an neih ṭhat zawk avangin a awm lo hran lo. 

Mahse, Villa-in mahni muala khel an ni tih pholangin Targett-a hmangin goal hmahruai an khung a, goal hi minute 12-na leka lut a nih avangin Foxes-in hmabak an nei ko nghal.

Premier League-ah pawh attacking hmuhnawm ber pawl ni thei Leicester-in na takin an nawr chhunzawm a, an beisei ber goal hlawh chhuak tur erawhin minute 72-na an nghah thlen a ngai. 

Brendan Rodgers hnuaia harhna chang Kelechi Iheanacho a rawn inlar a, kum 23 mi striker hian tun season-a match 13-a khelh aṭanga a goal riatna ni turin an si phurh sutna goal a rawn khung. 

Minute 90 a nih thlengin team pahnihin goal dang an khung tawh lo a, Villa Park-a inkhelah penalty hmangin final lut tur chinfel a ngai dawn niin a lang hman. 

Mahse, hun pek belh minute thumnaah Trezeguet a rawn inlar a, Egyptian player pahnihin Villa tana danglamna an thlen lai hmuhtirin kan awm. 

Egypt tana vawi 91 inlan tawh Ahmed Elmohamady chuan ram tana a khelhpui Trezeguet-a goal khung tur hi ṭha zetin a siamsak a, Foxes keeper Kasper Schmeichel-a'n tih theih a nei lo. 

Kum 25 mi midfielder Trezeguet hi a hming tak chu Mahmoud Ahmed Ibrahim Hassan a ni a, a naupan laia an coach-in French legend David Trezeguet nen an khelh dan in ang a tih avangin 'Trezeguet' tiin a ko a, a hming hi a pu hlen ta a ni. 

A hmingah Nyland 

Villa-in final an luh theih chhanah mimal taka lawmthu hrilh tur an nei a nih chuan goalkeeper Orjan Nyland hi lawmthu hrilh tur chu a ni a, Foxes pet goal ngei tur nia ngaih vawi tam a dang. 

Norwegian goalkeeper hian James Maddison-a pet goal ngei tur nia ngaih chu vawi hnih ngawt ṭha zetin a dang a, Youri Tielemans-a shot a dan phei chu ropui tak a ni. 

Kum 24 mi Jack Grealish en kan a harsa a, English midfielder hi a kum la nau mah se hruaitu ṭha a nihzia hmuh turin a awm a, a ṭul hunah ball a keng ngam bawk.

Pound maktaduai 10 man Mbwana Samatta-a'n Villa tana a match hmasa berah goal khungna remchang a nei a, mahse Grealish hnen aṭanga ball ṭha zet a hmuh chu a tawk pawh a tawk fuh lo!

Leicester City-in League Cup final an lut zo lo a, season duhawm tak an hman kumah nomawi an chawi dawn lo niin a lang - hei tak hi Brendan Rodgers tan a uiawm khawp ang. 

Rodgers hian Liverpool a enkawl laiin 2015 FA Cup semifinal-ah Villa hi a lo ngam lo tawh a, Celtic-a a hlawhtlin hnua a lo kir leh hnuah pawh Villa a la ngam ta chuang lo!

Leicester hian Premier League top four-ah awmin season thara Champions League an khelh ngei erawh a rinawm a, 'Big Six' tia an sawi club lian kara leng Foxes tan chuan hei ringawt pawh hi lawmna tur niin a lang. 

Villa hian kum 2010 khan League Cup final an lo khel tawh a, Manchester United an ngam lo - nizan semifinal pakhat inkhelah United hian Manchester City an ngam a nih chuan  2010 final rematch kan hmu dawn tihna a ni.