Group of Death aṭangin tute nge ding chang ang?

NEXA Independence Day Celebration Football Tournament-ah team ṭha pali awmna group A aṭanga semifinal lut tur chu vawiin hian a hriat dawn. Chhun dar 12:00-ah Electric Veng leh Mizoram Police an inkhel ang a, tlai dar 2:15-ah Chanmari leh Aizawl FC te an inhmachhawn ang.

Nimin group B inkhelah I Day Football champion lai Chhinga Vengin MPL kaithar FC Venghnuai 2-1 in an hneh a, inkhel dangah  Chawnpui FC leh Ramhlun North FC te 2-2 in an inhnehtawk.

Electric Veng FC leh Aizawl FC-in point li an hmu tawh a, Mizoram Police leh Chanmari FC ten point khat ve ve chauh hmu mah se semifinal lut thei vek an la ni.

Mizoram Police-in an match hmasa berah Aizawl FC 5-1 ngawta an hneh loh avangin goal difference en a ṭul a nih chuan an dinhmun a chhe dawn a, chutihrualin head to head a pawimawh dawn avangin Electric Veng an hneh phawt chuan semifinal luhna chance a sang khawp ang.

MPL7-ah khan semifinal lut tawha inngai Electric Veng chuan league round match hnuhnung berah Police an hneh lo a, khami ṭuma Electric Veng mipui tawrhna kha a tawng ve lo tan chuan hriatthiam theih a ni lo. Tun ṭumah hian Electric Veng hi dinhmun ṭha zawkah an ding nawn a, Lalsangzuala Hmar an kawl tawh bawk avangin Police lakah tawlhthluk nawn an tum lo ang.

Chanmari FC hian nikum khan MFA Super Cup final-ah Chhinga Veng an hneh loh hnuin I Day Football group stage an paltlang lo. Kuminah hian coach thar S. Malsawmtuanga an nei a, MFA Super Cup final-ah Police an hneh loh hnuin I Day Football group stage-a tla nawn thei dinhmunah an ding.

Mama hote hian coach ṭha Standly Rosario kaihhruai Aizawl FC an hmachhawn dawn a, hnehna an chang a nih erawh chuan I League club hi tla thei an ni. AFC hian match hmasa berah Police sawp mah se Electric Veng nen an inhnehtawk avangin an dinhmun a him lo.

Chawnpui FC-in FC Venghnuai an hmachhawn ṭumin goal li an chhuah hnuah goal thumin an chhanglet thei a, point erawh an hlawh chhuak zo lo. Niminah erawh point hmu khawpin an 'comeback' ta a, injury time-a Lalthanmawia Ralte penalty hmangin Ramhlun North FC nen 2-2 in an inhnehtawk.

Nimin inkhelah hian Ramhlun North  striker Jessy Vanlalmuana'n keeper tihsual nangchingin goal hmahruai a khung a, first half tawp hma hretin Chawnpui tan Moody Lalawmpuia'n a sut. Second half-ah Lalmawizuala hmangin Ramhlun North-in hma an hruai nawn a, chak thei turah inngai hman mah se Chawnpui substitute Lalramthara Pachuau penalty hlawhchhuah chu Amawia'n siphurh sut nan a hmang.

Coach Lalremruata kaihhruai Chhinga Vengin KC Larchhuakmawia leh Sylvana R.Lalruatkima te hmangin minute 20 chhungin FC Venghnuai lamah 2-0 in hma an hruai nghal a, an bul ṭan ṭhat hi an chakpui.

MPL kaithar FC Venghnuai tan Chhinga Veng defender Vanlalzuidika handball vanga an penalty hmuh hmangin Vanlalthanga'n minute 23-na lekah siphurh sut ṭhen mah se goal dang hmuh tur a awm tawh lo. Chhingcows 2-1 in an chak.