Archery Association of India an hrem

Khawvel thal kah intihsiak lama thuneitu sang ber World Archery (WA) chuan Archery Association of India (AAI) chu pawl pahniha an kal avangin a suspend. 

AAI chhungkuaah buaina a awm avangin June 9 khan New Delhi leh Chandigarh-ah a hranin inthlanna neih a ni a, state 20-in an thlawp Arjun Munda leh state 10 thlawp BVP Rao te chu President-ah thlan ve ve an ni - hei hi WA chuan dan bawhchhiatnaah an ngai. 

Indian thal kah thiamte chu August 19-25 inkara neih tur World Archery Youth Championships-ah inlan phalsak an la ni dawn a, a hnu lam erawh an inlan a rem tawh rih dawn lo.  

WA chuan Indian Olympic Association leh India sorkar nen tun thla chungin buaina hi chinfel an tum dawn a, an chingfel hman lo a nih chuan Asian Championships, Asian Para Championships leh Indoor Archery World Series-a Indian infiammite dinhmun tur ngaihtuah a ni ang. 

Asian leh Asian Para Championships-ah hian Olympic hmun ruak inchuh a nih dawn avangin a pawimawh hle.