Premier League transfer a tawp ta

Premier League transfer window chu nizan dar 9:30 khan a tawp a, David Luiz leh Kieran Tierney laluttu Arsenal chu transfer tawp nia che ṭha berah a ngaih theih. Manchester United erawh hming langsar Christian Eriksen, Mario Mandzukic, Paulo Dybala leh Bruno Fernandes te nen sawi zawm mah se pakhatmah a hlawhtling lo.

Argentine forward Dybala chu transfer tawp niah hming langsar a ni a, United nen an inrem loh hnuah Tottenham Hotspur-a lut tura ngaih a ni nachungin a hlawhtling ta chuang lo. Premier League transfer hi tawp tawh mah se Europe-a league lian dang chu September 2, Thawhṭanniah a tawp dawn chauh avangin Spurs midfielder Eriksen leh Manchester United midfielder Paul Pogba te chu la chhuak thei an ni.

Manchester City-in Juventus right back Joao Cancelo chu pound maktaduai 60-in an lalut a, Danilo chu pound maktaduai 34.1-in Italian club-ah hian an kaltir thung. 

Kum 25 mi Cancelo hian Etihad Stadium-ah kum 2025 thleng khel turin contract a ziak a, Angelino leh Rodri hnua City-in nipui transfer-a player an lakluh pathumna a ni. Season hmasaa Inter Milan aṭanga Juventus pan ve chauh Cancelo chuan, "Khawvela right back ṭha ber nih ka duh. Kyle Walker nena kan inel tur hi ka phur a, first XI chan ka tum ang," a ti a, Pep Guardiola chu City a zawm chhan niin a sawi bawk.

Man City tana chanchin duhawm lo erawh Communtiy Shield-a inhliam Leroy Sane chu beisei aiin a na a, karleh hian an zai dawn - Bayern Munich a zawm theih a rinawm loh.

Manchester United-in khawvel defender manto ber ni turin pound maktaduai 80-in Harry Maguire an lakluh bakah Aaron Wan-Bissaka (£50m) leh Daniel James (£15m) te lalut mah se an lak tum dang an hlawhchham vek.

United hian transfer tawp hnuah Spurs-a hlawhchham Fernando Llorente chu club a neih loh avangin an lalut thei ang. Chutihrualin Romelu Lukaku an chan avangin Llorente lalut reng pawh ni se nipui transfer-a an chet danah club ṭantute an lungawi lo ang. Transfer tawp ni hian Everton-in defender Marcos Rojo chu lak tumin United dawr mah se inremna an nei hman lo.

Arsenal chuan an tlarhnung thuam chak turin defender Kieran Tierney chu Celtic aṭangin pound maktaduai 25-in an lalut. Scotland international hian Emirates Stadium-ah season nga cham turin North London club hi a zawm.

Kum 22 mi Tierney hi season hmasa khan hliam vangin a inlan tam tawk lo, kumin May 4 hnu lamah a club tan a la khel leh lo. A club tharah inbengbel turin hun a mamawh deuh a nih pawhin a mak lo ang. Gunners winger Alex Iwobi chuan Everton a zawm thung a, season hmasa a goal thum khungtu man zat hi pound maktaduai 40 thlenga sang chho thei tur a ni ang.

Bazar tawp niah Chelsea aṭangin season hmasa lama an rinrawl David Luiz chu pound maktaduai riatin an la bawk - Brazil international hian kum hnih daih contract a ziak. Kum 32 mi Luiz hi captain chhuak ta Laurent Koscielny hmunruak luah tur a ni ang. 

He thu buatsaih lai hian Gunners chuan Luiz an lak thu hi an la puang zar lo. Transfer chinfel nan zan dar 11:30 thleng hawn a ni a, club hrang hrangin player paruk hming an thehlut a, heng zingah hian Luiz pawh tel ngei tura ngaih a ni.

Season hmasa khan Leicester City chuan Adrien Silva chu Sporting Lisbon aṭangin pound maktaduai 22 sengin an lalut a, mahse second 14 chauha an ziahfel hman loh avangin season chanve chhung chu an chhawr thei lo - January thla hnuah an chhawr thei chauh a ni.

Nimin thleng khan Tottenham leh Paulo Dybala chu inhnaih viau mah se zan lamah Juventus an inhnukdawk. Dybala hian kar khatah £300,000 hlawh a phut. Spurs hian an player hlawh hnem ber Harry Kane hlawh ang zat £200,000 pek an inhuam a, a bak hi Juventus-in an pek sak tura tih a ni. 

Mahse, Dybala image rights (sumdawnnaa a hming leh nihna hman theihna) hi Juventus ni loin Star Image Company ta a ni a, chu chu pound maktaduai 15-a lei tel a ngai. Spurs hian image rights leinaa pawisa thawh ve turin Juventus an la beisei cheu a, Italian club hian an duh tawh bik lo. Spurs hian Dybala rilru a hmin tawk lo niin an ngai ve bawk. 

Tottenham hian kum 23 mi midfielder Giovani Lo Celso chu Spanish club Real Betis aṭangin loan-in an hawh thung a, an duh chuan season tawpah an la nghet thei ang.