Zaninah Premier League Ṭan a ni dawn Liverpool hun a thleng nghal

Premier League season a in ṭan leh dawn ta a, match hmasa berah zanin dar 12:30 hian Anfield-ah Liverpool leh Norwich City an inkhel ang.

"Anfield-ah chauh kan hmuh ṭhin boruak nuam tak kha tem leh kan duh a ni," tiin Jurgen Klopp-a'n fan-te a fuih phur sa a, zanin inkhel boruak a sang a nih pawhin mak ti suh.

Team pahnih hian in an lohna tak an nei–Reds hi European champion an ni a, Norwich erawh Championship aṭanga Premier League kai thar an ni.

Mahse, nipui transfer-ah club pahnih an che na lo ve ve a, sum tam tak seng lo chunga an tum ram thlen ve ve an tum dawn. Liverpool-in champion an tum a, Norwich tan inhamtan chu thupui tur a ni thung.

Season chawlh a rei a, Klopp lung a leng hman. German coach chuan, "Fan-ten phur takin min lo nghak dawn a, keini pawhin an hmel hmuh kan châk tawh. Anfield-a kan inkhelh lohna a rei ta a, mahse engtiklai pawhin kan inpeih at reng tur a ni," a ti.

Team pahnih squad khaikhinin Liverpool hi awlsam taka chak mai tura beisei an ni a, chutihrual chuan football-ah chuan 'upset' a thleng thei tih hriat tel a ṭha. Klopp chuan, "Duhthlan tur tam tak kan nei a, inkhel bul ṭan tur ber thlan pawh thil harsa tak a ni. A pawimawh ber erawh kan inlungrual a ni a, eng team mahin tum an châk loh nih ka duh," a ti.

Liverpool hi season hmasa Champions League-ah champion mah se an duh ber chu Premier League a ni a, season hmasaah match khat lek chak lo chungin an champion zo lo–match khatin a hril thui theihzia an hrechiang a, chetsual loh hram an duh ang.

Community Shield-a lang chiang tak chu Liverpool-in Sadio Mane ai awh zo an nei lo tih a ni a, Manchester City an ngam loh hnua squad zawm ve chauh hian Norwich a hmachhawn beisei a ni.

Klopp chuan, "Nilaini khan training a zawm ve chauh a, mahse a in fit-in ka hria. Duhthlan tur zingah a tel ang," a ti a, Kop tan rimawi a ni. Liverpool-in transfer bazar-ah sum seng na lo mah se Mohamed Salah, Roberto Firmino, Mane, Virgil van Dijk leh Alisson chelh ringawt pawh hi lawmna tham a tling a, tawh an khirh dawn.

Norwich City manager Daniel Farke chuan, "Jurgen Klopp hi ka fak tawp thei lo. World class coach a ni a, Liverpool-a a hnathawh hi a ropui em em bawk," a ti.

Farke-a'n Klopp ngaisang viau mah se zanina a tih tur chu Liverpool hneh a ni a, match hmasa bera Reds an hneh nghal chuan beiseina nen phur takin season an thlir thei ang. Norwich hian nipui transfer-ah player panga chiah an lalut a, defensive midfielder Ibrahim Amadou, winger Patrick Roberts leh goalkeeper Ralf Fahrmann te chu loan-in an la a, Josip Drmic (free transfer) leh Sam Byram (£750,000) te chu a nghetin an la thung.