Transfer record: Club ten £5.6bn an seng!

Football khawvela thuneitu sang ber FIFA chuan kum 2019-a khawvel hmun hrang hranga club ten player lei nana sum an sen zat an tarlang a, record thar siamin pound tluklehdingawn 5.6 ngawt an seng!

Kum 2018-a club ten player lei nana an sen zat chu 5.8% ngawtin an khum a, Mizo te ngaihven English club ten mak takin 2018-a an sum sen zat an phak lo. 

FIFA tarlan danin English club-te hian nikum khan pound tluklehdingawn 1.5 an seng a, kum 2018-a an sum sen zat aṭanga teh chuan transfer-a an sum hman hi 22.1% in a tlahniam a ni. 

Mipa football-a transfer awm zat hi 18,042 a tling a, record thar a ni. Heti zat transfer awm tur hian player 15,463-in an club awmna an thlak a, heng player-te hi ram 178 mi an ni!

Transfer heti zatah hian FIFA hnuaia ram association 211 aṭangin 179 an tel a, club inhnamhnawih zat hi 4,162 an tling - Asian Football Confederation hnuaia ram 46 zinga 45 chuan transfer an nei vek. 

FIFA chief legal and compliance officer Dr Emilio Garcia Silvero chuan, "Mipa football-a heti zat transfer awm a, record thar siam a ni hi a lawmawm hle," a ti.

Kum 2019 chhung khan hmeichhe football-ah transfer atan £497,000 sen a ni a, hmeichhe football transfer-a sum che vel a tam ber ṭum a ni. 

Hmeichhe football-a sum che hi kum 2018 aṭanga teh chuan 16.3% in a sang a, hmeichhe player 833 transfer zingah US football-ah hmeichhe footballer transfer an tam ber a, 20% a tling. 

Dr Emilio Garcia Silvero chuan, "Hmeichhe football-a transfer-te pawh uluk takin kan zirchiang a, hmasawnna hmuh tur a awm hi a lawmawm takzet. Kum 2020-ah pawh hmasawnna hmuh tur a awm zel ka beisei," a ti. 

Kum 2019 khan Indian football-ah pawh transfer a awm nual a, ram dang aṭanga players lakluh zat hi 108 a tling - 2018 nena khaikhin erawhin 21.7% in a tlahniam thung. 

India aṭanga players kal chhuak zat hi 68 a tling a, kum 2018 aṭanga tehin 17.1% in a tlahniam thung. India-in ram dang aṭanga player lakluh an ngah hi thil mak a ni hran lo. 

Indian Super League-ah club pakhat zelin ram pawn player pasarih an kawl phal a ni a, 

I League-ah foreign player paruk kawl theih a ni bawk.