Man United-in Bruno Fernandes an hnaih

Manchester United ṭantuten nikum nipui transfer-a an beisei tawh Bruno Fernandes an nghak chhuak dawn ta niin a lang a, Portuguese midfielder chungchangah English club leh Sporting Lisbon te an inrem hnai niin an sawi.

January transfer ṭan tirh aṭang khan club pahnih hi an indawr ṭan tawh a, Man United hian Sporting phalna zat euro maktaduai 80 (£68m) pek an remtih loh avangin transfer a thleng thei lo.

Thawhlehni khan hmasawnna a awm a, United hian kum 25 mi Bruno Fernandes hi pound maktaduai 47-in lakluh theih ngei an beisei a. An inbiakna hi a hlawhtlin chuan tun January-a Premier League transfer lian ber a ni thei ang.

Fernandes hian kum 2017 khan Sampdoria aṭangin Sporting hi pound maktaduai 7.2-in a zawm a. Portuguese club tan hian match 137-ah goal 64 a khung a, Portuguese Cup nomawi chawi tawhin 2017-18 leh 2018-19 season khan Primeira Liga player of the year a ni ve ve.

Hetihlai hian United ṭantu ṭhenkhatin executive vice-chairman Ed Woodward in an bei a, a nunna thlengin a tawrh theih thu an inkawtah an au chhuahpui. United hian tun hnaiah result ṭha an nei lo a, transfer-ah player langsar an lak theih loh avangin club ṭantute hian Woodward hi mawhphurtuah an ngai.

Manchester United chuan, "Fan-te'n ngaihdan an auhchhuahpui hi kalphung pangngai a ni a, thil ti chhia leh midang nunna la zawnga vau erawh palzam theih a ni lo. Police nena thawk hoin an chungah hremna lak ngei a ni ang," tiin thuchhuah an siam.